Футбол эксперти Александр Точилин «Евро-Футбол.Ру» нашрига берган интервьюсида ФИФА президенти Жанни Инфантинонинг Россия терма жамоалари ва клубларига қўйилган чекловларни бекор қилиш ҳақидаги фикрларига, шунингдек, МОК Россия спортига нисбатан санкцияларни яқин фурсатда олиб ташлаши мумкинлиги ҳақидаги хабарларга муносабат билдирди. Бу ҳақда euro-football.ru хабар беради.
Дунё ОАВлари Миландаги МОК йиғилишида Россия спортига қўйилган барча санкцияларни тез орада бекор қилиш бўйича принципиал қарор пишиб етилгани ҳақида ёзмоқда. Точилин бундай сценарий рўй беришини исташини айтди: унинг фикрича, бу мавзу узоқ вақт давомида муҳокама қилинаяпти ва изоляциядан чиқиш учун Европадан аниқ сиёсий-ижтимоий қарор зарур.
Экспертнинг таъкидлашича, йирик мусобақалар Россиясиз аввалгидек интрига ва оммабопликни йўқотади. Шу боис у «гап амалда ҳам тасдиқланса» деган умидда эканини қўшимча қилди.
Инфантино Россия иштирокига қўйилган тақиқни «мазмунсиз» деб атагани ҳақида тўхталган Точилин бу баёнотни дунёда вазият ўзгариб бораётгани билан изоҳлади. У Россияга нисбатан икки хил стандарт ва бирёқлама ёндашув кўринганини, аммо вақт ўтиши билан тақиқнинг ўзи ҳам мантиқсиз ҳолат экани англашилаётганини айтди.
Точилинга кўра, агар МОК санкцияларни бекор қилса, бу футболга ҳам бевосита таъсир кўрсатиши мумкин. У буни «занжирли реакция» деб атаб, МОК каби йирик тузилма прецедент яратса, ФИФА ва УЕФА сингари бошқа ташкилотлар ҳам аввалги қарорларини қайта кўриб чиқишга мажбур бўлишини таъкидлади.
Инфантино келажакда жамоаларни сиёсат сабаб четлатишни қонунан тақиқлаш кераклигини ҳам айтганди. Точилин эса спортнинг асосий шиори сиёсатдан холи бўлиши экани, Россия бўйича қабул қилинган қарорлар эса айнан шу тамойилга зид кўринишини билдирди.
Шунингдек, ОАВларда ФИФА апрел ойидаги конгрессда Россиянинг халқаро турнирларга тўлиқ қайтиши масаласини муҳокама қилиши мумкинлиги ёзилмоқда. Точилин бундай муддатларда қайтиш эҳтимолини инкор этмади ва бу каби маълумотлар «асоссиз пайдо бўлмайди» деган фикрни илгари сурди.
Эксперт Россия қайтган тақдирда ҳам айрим рақиблар майдонга тушишдан бош тортиши мумкинлигини тан олди. Унинг айтишича, бундай вазиятда ҳар бир ташкилот ўз регламентига таяниб иш кўриши, қоидани бузганларга интизомий чоралар қўллаши керак; техник мағлубиятлар берилиши бошқаларга ҳам «бундай демаршлар фойда келтирмайди» деган сигнал бўлади.
“Zamin”ни Telegram'да ўқинг!
