Madridning “Real” klubida o‘ynagan sobiq darvozabon Keylor Navas Vinisius Juniorni qo‘llab-quvvatladi. Hujumchi Chempionlar ligasida “Benfika”ga qarshi o‘tgan bahsda o‘ziga nisbatan irqchilik haqoratlari bo‘lganini aytdi va bu holatda raqib qanot hujumchisi Janluka Prestiannini aybladi. Bu haqda euro-football.ru xabar beradi.
Navasning ta’kidlashicha, Vinisius bilan bog‘liq vaziyat uni juda ranjitgan: bunday holatlar hech kim bilan sodir bo‘lmasligi kerak. U shaxsan taniydigan futbolchi jabrlansa, og‘riqni yanada chuqurroq his qilishini aytib, bunday hodisalar na Viniga, na boshqa birovga qaytarilmasligi uchun hamma birgalikda harakat qilishi zarurligini bildirdi.
Shuningdek, Navas Kilian Mbappening Prestiannini chetlatish haqidagi fikrlariga ham to‘xtaldi. Uning so‘zlariga ko‘ra, qanday jazo berilishi kerakligini aniq aytish qiyin, biroq bunday gap-so‘zlar uchun albatta javobgarlik bo‘lishi shart va ataylab haqorat qiladiganlarga nisbatan qat’iy choralar ko‘rilishi lozim.
Eslatib o‘tamiz, pley-offning ilk uchrashuvida Vinisiusning goli “Real”ga “Benfika” ustidan 1:0 hisobida g‘alaba keltirdi. Javob o‘yini 25 fevral kuni bo‘lib o‘tadi.
“Zamin”ni Telegramʻda oʻqing!
