«Liverpul» klubi vengeriyalik yarim himoyachi Dominik Soboslayning kelajagi borasida xavotirga tushmoqda. «Real Madrid» jamoasining futbolchiga bo'lgan qiziqishi ortib borayotgan bir paytda, «Enfild» rahbariyati 25 yoshli o'yinchi bilan amaldagi kelishuvni qayta ko'rib chiqishga chaqirildi. Soboslay «RB Leypsig»dan 60 million funt sterling evaziga transfer qilinganidan buyon jamoaning asosiy figuralaridan biriga aylandi. Bu haqda Goal.com xabar beradi.
Klub afsonasi Gari Mak Alister rahbariyatni vengeriyalik iqtidor egasini uzoq muddatga jamoada olib qolish uchun faol harakat qilishga undadi. Uning ta'kidlashicha, shartnoma yakunlanishiga ikki yil qolganida «xavf qo'ng'iroqlari» chalina boshlaydi. Soboslay joriy mavsumda 48 ta o'yinda maydonga tushib, 12 ta gol va 9 ta golli uzatmani amalga oshirdi. Uning hozirgi shartnomasi 2028 yilning iyunigacha amal qilsa-da, Yevropaning grand klublari allaqachon vaziyatni kuzatmoqda.
Mak Alister Soboslayni nafaqat mahoratli o'yinchi, balki jismoniy jihatdan juda chidamli atlet deb hisoblaydi. Uning maydondagi tinimsiz mehnati va standart vaziyatlardagi mahorati muxlislar mehrini qozonishiga sabab bo'lgan. Sobiq futbolchining fikricha, Dominik o'zining yetakchilik qobiliyati bilan Virjil van Deykdan keyin jamoa sardori bo'lishga munosib nomzoddir.
Vengriya terma jamoasi bosh murabbiyi Marko Rossi ham vaziyatga to'xtalib, Soboslay bolaligidan «Real Madrid»da o'ynashni orzu qilganini ma'lum qildi. Bu xabarlar Madrid klubi rahbarlarini hushyor torttirgan. Endilikda «Liverpul» yozgi transfer oynasida o'z yulduzini saqlab qolish va uning Ispaniyadagi faoliyati haqidagi ambitsiyalari o'rtasida muvozanat topishi kerak bo'ladi.
“Zamin”ni Telegramʻda oʻqing! 
