Turkiya Superligasining 31-turi «Istanbul Bashakshehir» va «Qosimposho» oʻrtasidagi bahs bilan start oldi. Mavsum hal qiluvchi bosqichga kirib kelgan bir paytda har bir uchrashuv jamoalar uchun katta ahamiyat kasb etmoqda.
Ayni paytda chempionlik masalasi deyarli hal boʻlgan — «Galatasaroy» navbatdagi titulga yaqin turibdi. «Fenerbahche» va «Trabzonspor» esa peshqadamni quvib yetishi qiyin, ammo ikkinchi oʻrin uchun oʻzaro keskin raqobat olib bormoqda. «Beshiktosh» esa sovrinli pogʻonalardan chetda qolgan boʻlsa-da, Yevrokuboklar yoʻllanmasini beruvchi toʻrtinchi oʻrinni saqlab turibdi.
Yevropa musobaqalariga chiqish uchun esa «Istanbul Bashakshehir» va «Gyoztepe» oʻrtasida alohida kurash kechmoqda. Garchi bu jamoalar kuchli toʻrtlikka kirishi qiyin boʻlsa-da, Turkiya kubogi natijalariga qarab beshinchi oʻrin ham Yevrokuboklarga yoʻl ochishi mumkin.
Shu sabab Nuri Shahin shogirdlari har bir oʻyinda faqat gʻalaba uchun harakat qilmoqda. «Qosimposho»ga qarshi bahsda ham bu yaqqol namoyon boʻldi. Uchrashuvning 5-daqiqasidayoq Eldor Shomurodov hisobni ochib, jamoasiga tezkor ustunlik berdi. Birinchi boʻlimda Bertugʻ Yildirim ikkinchi golni urdi va mezbonlar ustunligini mustahkamladi.
Ikkinchi taymda Devi Zelke oʻz hisobini toʻldirib, mavsumdagi toʻqqizinchi golini kiritdi. Oʻyinning soʻnggi daqiqalarida esa yana Shomurodov sahnaga chiqdi — hamyurtimiz bosh bilan aniq zarba berib, hisobni 4:0 koʻrinishiga olib keldi va dubl qayd etdi.
Ushbu natija bilan oʻzbekistonlik hujumchi Turkiya chempionatidagi gollari sonini 20 taga yetkazdi va toʻpurarlar poygasida yetakchilar qatoriga yaqinlashdi. Ayni paytda 22 gol bilan «Trabzonspor» forvardi Pol Onuachu peshqadam boʻlib turibdi. Shuningdek, «Fenerbahche» hujumchisi Taliska ham 16 gol bilan kuchli uchlikda joy olgan.
Shomurodov esa avvalroq shaxsiy yutuqlardan koʻra jamoa natijalarini ustun qoʻyishini taʼkidlagan. Biroq uning hozirgi formasi toʻpurarlik uchun ham jiddiy daʼvogar ekanini koʻrsatmoqda.
Navbatdagi gʻalabadan soʻng «Istanbul Bashakshehir» 51 ochko bilan turnir jadvalida 5-oʻrinni mustahkamladi. Jamoa keyingi turda 3 may kuni safarda «Fenerbahche»ga qarshi maydonga tushadi.
Qisqasi, Shomurodov va uning jamoasi yuqori formada. Agar shu temp saqlansa, «Bashakshehir» Yevrokuboklar yoʻllanmasi uchun kurashda jiddiy raqib boʻlib qolishi aniq.
“Zamin”ni Telegramʻda oʻqing!
