Italiya A Seriyasining 27-turida "Napoli" safarda turnir jadvalining quyi qismida borayotgan "Verona" bilan to'qnash keldi. Bu haqda euro-football.ru xabar beradi.
Uchrashuv juda erta gol bilan boshlandi: 2-daqiqada Matteo Politano jarima maydoni oldiga uzatma berdi, to'pni himoyachi qaytarganidan keyin Rasmus Xoylunn vaziyatdan unumli foydalanib, bosh bilan chap burchakka yo'lladi — 0:1. Keyinroq Elif Elmas jarima maydoni tashqarisidan kuchli zarba berdi, biroq darvozabon seyv bilan jamoasini qutqardi. Yana bir epizodda Xoylunn darvozabonga yakkama-yakka chiqib ketay dedi, ammo Andrías Edmundsson vaqtida qaytib, zarbani blokladi.
64-daqiqada "Verona" burchak zarbasidan keyin hisobni tenglashtirdi: Rasmus Xoylunn to'pni bosh bilan uzoqlashtirgach, Jan-Daniel Akpa-Akpro ikkinchi to'pga zarba berdi va rikoshetdan keyin to'p darvozadan joy oldi — 1:1. "Napoli" tezkor hujumlarda javob qaytarishga urinib ko'rdi: Romelu Lukaku jarima maydoni markaziga pas tashladi, Elmas bir teginishda zarba berdi, ammo to'p darvozabon qo'liga aniq bordi.
Bahsning so'nggi hujumida amaldagi chempionlar baribir o'z so'zini o'tkazdi: chap qanotdan Jiovane uzatgan past pasni Romelu Lukaku yakunlab, "Napoli"ga g'alabani taqdim etdi — 1:2.
Ushbu natijadan so'ng "Napoli" ikkinchi o'rindagi "Milan"dan atigi bir ochko ortda bormoqda. "Verona" esa jadvalning eng past pog'onasidagi jamoalar bilan birga qolmoqda.
“Zamin”ni Telegramʻda oʻqing!
