Jarohatdan soʻng Yamal ijtimoiy tarmoq orqali muxlislarga murojaat qildi

«Barselona»ning yosh va umidli vingeri Lamin Yamal jarohati sababli mavsumning qolgan qismida maydonga tusha olmasligi maʼlum boʻlgach, muxlislarga murojaat qildi. U ijtimoiy tarmoqlardagi sahifasi orqali oʻz holati va his-tuygʻularini ochiq bayon etdi.

Futbolchining taʼkidlashicha, aynan jamoaga eng kerak boʻlgan pallada maydondan chetda qolish uni qattiq ranjitgan. U bu vaziyatni soʻz bilan ifodalash qiyinligini, jamoadoshlari bilan yelkama-yelka turib kurasha olmayotgani uning uchun ogʻir ekanini tan oldi.

— Bu jarohat meni maydondan uzoqlashtirdi, aynan men oʻynashni istagan bir paytda. Holatimni tushuntirish oson emas, chunki jamoadoshlarim bilan birga kurasha olmayapman, ular menga muhtoj boʻlgan vaqtda yordam bera olmayapman. Lekin men ularga ishonaman va har bir oʻyinda bor imkoniyatlarini ishga solishlarini bilaman, — dedi Yamal.

Shu bilan birga, u jamoadan uzoqda boʻlsa-da, ruhan ular bilan ekanini alohida taʼkidladi. Futbolchi jamoadoshlarini qoʻllab-quvvatlashda davom etishini, ularning har bir gʻalabasidan quvonishini bildirdi.

— Men maydonda boʻlmasam ham jamoa bilan birgaman. Ularga yordam berishda davom etaman va ular bilan birga quvonaman. Bu oxir emas, faqat vaqtinchalik tanaffus. Men yanada kuchli boʻlib qaytaman, yanada katta ishtiyoq bilan. Keyingi mavsum albatta yaxshi boʻladi, — deya qoʻshimcha qildi u.

Eslatib oʻtamiz, Yamal Ispaniya chempionatining 33-turida «Selta»ga qarshi bahsda jarohat olgan edi. U birinchi boʻlimda penaltidan gol urayotgan pallada shikastlangan va shundan soʻng maydonni tark etishga majbur boʻlgan.

Qisqasi, «Barselona» yosh yulduzisiz mavsumni yakunlashga majbur boʻlsa-da, muxlislar Yamalning tezroq safga qaytib, yanada yorqin oʻyinlar namoyon etishiga ishonmoqda.