Rossiyalik boylar urush xavfidan qochib Yangi Zelandiyaga yuzlanmoqda
Rossiyalik badavlat shaxslar global urush xavfi tufayli Yangi Zelandiyani xavfsiz boshpana sifatida tanlamoqda va u yerda ko'chmas mulkka bo'lgan qiziqish uch baravarga oshgan. Ayniqsa, yer osti bunkerlari va avtonom tizimlarga ega uylarga talab yuqori bo'lib, uy-joy narxlari 2,5 million dollargacha ko'tarilgan. Mutaxassislar bu holatni dunyodagi geosiyosiy beqarorlik hamda boy qatlamning o'z oilasi uchun xavfsiz "panohgoh" yaratish istagi bilan izohlamoqda. Mazkur tendensiya kelgusida global ko'chmas mulk bozoridagi narxlarning yanada oshishiga sabab bo'lishi mumkin.
OAV xabarlariga ko‘ra, Rossiyaning badavlat qatlami vakillari ehtimoliy global ziddiyatlar, xususan Uchinchi jahon urushi xavfi ortib borayotgani fonida xavfsiz hudud sifatida Yangi Zelandiyaga qiziqish bildirmoqda. Ayniqsa, bunkerlar bilan jihozlangan uy-joylarga talab keskin ortgani qayd etilmoqda.
Ma’lum qilinishicha, so‘nggi vaqtlarda “xavfsiz mamlakat” sifatida qaralayotgan ushbu davlatda ko‘chmas mulkka bo‘lgan qiziqish deyarli uch baravarga oshgan. Eng ko‘p talab Oklend, Vellington va Kraystcherch shaharlaridagi uylarga qaratilmoqda.
Mutaxassislar ta’kidlashicha, mazkur shaharlardagi uy-joy narxlari ham shunga yarasha sezilarli darajada qimmatlashgan. Hozirda ko‘chmas mulk qiymati 300 ming dollardan boshlanib, 2,5 million dollargacha yetayotgani aytilmoqda. Ayrim holatlarda esa yer osti bunkerlari, avtonom energiya va suv ta’minotiga ega uylar ayniqsa xaridorgir bo‘lmoqda.
Kuzatuvchilar fikricha, bu holat jahondagi geosiyosiy beqarorlik, xavfsizlikka bo‘lgan xavotir va kelajakka nisbatan noaniqliklar bilan bog‘liq. Shu bois, moliyaviy imkoniyati yuqori bo‘lgan shaxslar o‘zlari va oilalari uchun ehtimoliy xavflardan uzoqroq, tinch va barqaror hududlarda zaxira “panohgoh” tayyorlashga harakat qilmoqda.
Ayni paytda tahlilchilar bunday tendensiya global ko‘chmas mulk bozoriga ham ta’sir ko‘rsatishi mumkinligini ta’kidlab, ayrim davlatlarda narxlar yanada oshib borishini istisno etmayapti.
Izohlar 0
…