La Liganing 26-turida beqaror o‘yin ko‘rsatayotgan «Atletiko» safarda chempionatning eng quyi pog‘onasidagi «Real Ovyedo» bilan to‘qnash keldi. Madridliklar raqibga nisbatan qariyb ikki baravar kam zarba berdi, darvozaga aniq yo‘llangan ilk urinish esa deyarli yakunda qayd etildi. Uchrashuv umuman olganda ko‘p vaziyatlarga boy bo‘lmadi. Bu haqda euro-football.ru xabar beradi.
Birinchi bo‘lim o‘rtalarida Federiko Vinyas Alberto Reyna uzatmasidan so‘ng burchak ostida darvozabon bilan yuzma-yuz chiqdi, biroq mehmonlar posboni duelda ustun keldi. Ilyas Chayra o‘ng qanotdan oshirilgan to‘pga yaqin masofadan bosh bilan zarba berdi, darvozabon refleks ko‘rsatib qutqardi. Reyna esa burchak zarbasidan keyin jarima maydonchasi o‘ng chetidan uzoq burchakka yo‘llagan zarbasi ham seyv bilan yakunlandi.
Ikkinchi bo‘lim oxirlarida tajribali Santi Kasorla jarima maydonchasida Vinyasni topdi, u esa to‘pni Tyago Fernandesga qoldirdi — 10 metrdan berilgan zarba ustun yonidan o‘tib ketdi. Shundan so‘ng «Atletiko»ning ilk jiddiy hujumi golga aylanay dedi: Antuan Grizmann chap tomondan jarima maydonchasiga kirib kelayotgan Aleks Baenaga nozik pas uzatdi, u darvozabonni “teshib” o‘tdi, ammo hakam ofsaydni qayd etdi.
Hal qiluvchi epizod esa so‘nggi hujumda yuz berdi. Nauyel Molinaning o‘ng qanotdan uzatmasi to‘xtatildi, biroq to‘p omadli tarzda Xulian Alvarezga kelib tushdi. Hujumchi himoyachini aldab, chap oyog‘iga moslab oldi va 11 metrdan yaqin burchakka aniq zarba yo‘llab, «Atletiko»ga 0:1 hisobidagi g‘alabani taqdim etdi.
Natijada «Real Ovyedo» turnir jadvalida oxirgi o‘rinda qolmoqda, «Atletiko» esa uchinchi pog‘onadagi jamoalar bilan bir qatorda bormoqda.
“Zamin”ni Telegramʻda oʻqing!
