AQSHda poyezd yuk mashinasiga urildi, haydovchi omon qoldi

24 aprel kuni AQSHda temir yo‘l kesishmasida jiddiy yo‘l-transport hodisasi yuz berdi. Bu haqda Fox News telekanali xabar tarqatdi.

Ma’lum qilinishicha, yuk mashinasi temir yo‘l kesishmasining o‘rtasida noma’lum sababga ko‘ra to‘xtab qolgan. Aynan shu paytda katta tezlikda yaqinlashib kelayotgan poyezd mashinistiga vaziyatni nazorat qilish va to‘xtash uchun yetarli vaqt bo‘lmagan.

Natijada poyezd yuk mashinasining tirkamasiga borib urilgan va uni bir necha metrga relslar bo‘ylab sudrab ketgan. Hodisa juda keskin va xavfli tus olgan bo‘lsa-da, fura haydovchisi to‘qnashuvdan bir necha soniya oldin kabinadan sakrab chiqishga ulgurgan.

Rasmiylarning bildirishicha, ushbu hodisa oqibatida hech kim jabrlanmagan. Voqea joyida tegishli xizmatlar tomonidan o‘rganish ishlari olib borilmoqda.

Mutaxassislar bunday holatlarning oldini olish uchun haydovchilarni temir yo‘l kesishmalarida yanada ehtiyotkor bo‘lishga, texnik nosozliklar yuzaga kelganda esa zudlik bilan xavfsizlik choralarini ko‘rishga chaqirmoqda.

Charos Zarqarayeva

«ZAMIN.UZ» muharriri

+ Zamin.uz saytini Google'ga qo'shing