Yevropa futbolining 2024/25 yilgi mavsumi uchun e'lon qilingan moliyaviy hisobotlar tizimdagi jiddiy muammolarni va ko'plab klublarning hayratlanarli darajadagi zarar ko'rayotganini ochib berdi. Dunyoning eng kuchli ligasi deb e'tirof etiladigan Angliya Premyer-ligasi bu borada salbiy ko'rsatkichlar bo'yicha yetakchilik qilmoqda. APLning 20 ta klubi jami 1,05 milliard dollar miqdorida zarar ko'rgan bo'lsa, bunda asosiy ulush 346 million dollarlik rekord darajadagi defitsit bilan "Chelsi" hissasiga to'g'ri keldi. Bu haqda Auto.mail.ru xabar beradi.
Yevropaning boshqa grand klublari orasida moliyaviy holat turlicha ko'rinish olgan. Italiyaning "Inter" klubi 96 million dollar foyda bilan eng yaxshi natijani qayd etgan bo'lsa, Ispaniyaning "Real Madrid" va "Barselona" jamoalari mos ravishda 85 million va 81 million dollar foyda ko'rgan. Germaniyaning "Bavariya" klubi 48 million dollar, Angliyaning "Man Siti" jamoasi esa 3 million dollar ijobiy balansga ega bo'ldi.
Shu bilan birga, bir qator mashhur klublar katta miqdordagi moliyaviy yo'qotishlarga duch keldi. Xususan, "Man Yunayted" 24 million dollar, Fransiyaning "PSJ" klubi esa 42 million dollar zarar ko'rganini ma'lum qildi. Mutaxassislarning ta'kidlashicha, hatto eng yuqori daromadli ligalarda ham moliyaviy muvozanatni saqlash tobora qiyinlashib bormoqda. "Chelsi"ning ko'rsatkichlari esa nafaqat Angliya, balki butun futbol tarixi uchun xavotirli rekord sifatida baholanmoqda.
