Sherzod Temirov Iroq klubida maosh olishdan bosh tortdi
Iroqning "Arbil" klubi hujumchisi Sherzod Temirov jamoada yuzaga kelgan moliyaviy inqiroz sababli aprel oyi uchun beriladigan maoshidan voz kechdi. O‘zbekistonlik futbolchi ushbu mablag‘ni to‘rt oydan buyon maosh ololmayotgan mahalliy jamoadoshlariga tarqatishni taklif qildi. Temirov legioner sifatida o‘z haqini FIFA orqali undirish imkoniga ega bo‘lsa-da, jamoadoshlarining manfaatini o‘zining moddiy manfaatidan ustun qo‘ydi. Futbolchining ushbu olijanob harakati Iroq sport jamoatchiligi va muxlislari tomonidan yuksak e’tirof etilmoqda.
Iroqning «Arbil» klubida to'p surayotgan o'zbekistonlik hujumchi Sherzod Temirov jamoada yuzaga kelgan moliyaviy inqiroz sharoitida o'ziga xos olijanoblik ko'rsatdi. Iroqlik jurnalistlarning xabar berishicha, klubda to'rt oydan buyon maoshlar berilmayapti. Moliyaviy muammolar birinchi navbatda mahalliy futbolchilarga qattiq ta'sir ko'rsatgan bo'lsa-da, legioner sifatida Temirov shu vaqtga qadar o'z ish haqini o'z vaqtida olib kelgan.
Aprel oyi uchun belgilangan navbatdagi maosh to'lovi vaqtida o'zbekistonlik futbolchi pulni olishdan bosh tortdi. U klub rahbariyatiga murojaat qilib, ajratilgan mablag'ni birinchi navbatda bir necha oydan beri maoshsiz qolayotgan mahalliy jamoadoshlariga tarqatishni taklif qildi. Temirovning ushbu qarori iroqlik muxlislar va sport jamoatchiligi tomonidan yuqori baholanmoqda.
Vaziyatning huquqiy tomoni shundaki, legioner maqomidagi futbolchi maosh kechikkan taqdirda har doim FIFA orqali o'z huquqlarini himoya qilish va mablag'ni undirish imkoniyatiga ega. Mahalliy o'yinchilarda esa bunday xalqaro himoya mexanizmi mavjud emas. Sherzod Temirov aynan shu mantiqqa tayanib, jamoadoshlarining ijtimoiy holatini yaxshilashni o'z manfaatidan ustun qo'ydi.
Izohlar 0
…