Sunʼiy intellekt chiplari ishlab chiqaruvchi Groq startapi oʻzining inferens-bulutli (inference cloud) biznesini kengaytirish maqsadida mavjud investorlardan 650 million dollar miqdorida yangi mablagʻ jalb qilishni rejalashtirmoqda. Axios nashrining xabar berishicha, kompaniya oʻzi ishlab chiqqan maxsus chiplar va tizimlar yordamida hisoblash quvvatlarini taqdim etishga eʼtibor qaratmoqda. Bu haqda Techcrunch.com xabar beradi.
Oʻtgan yilning dekabr oyida Groq va NVIDIA oʻrtasida oʻziga xos kelishuv imzolangan edi. Ushbu bitim doirasida NVIDIA startapning apparat texnologiyalarini litsenziyalagan va Groqʻning bir qator yuqori lavozimli xodimlari chip giganti safiga oʻtgan edi. Mazkur kelishuv qiymati 20 milliard dollarga baholangan boʻlib, bu NVIDIA uchun tarixdagi eng yirik xaridlardan biri boʻlishi mumkin edi, biroq u toʻliq sotib olish emas, balki texnologik hamkorlik shaklida amalga oshirildi.
Endilikda Groq investorlari kompaniyaning yangi strategiyasini qoʻllab-quvvatlashga chaqirilmoqda. Yangi yoʻnalish ishlab chiquvchilar va korxonalar uchun sunʼiy intellekt ilovalarini joylashtirish imkonini beruvchi bulutli xizmatlarni rivojlantirishga qaratilgan. Hozirgi vaqtda sunʼiy intellekt olamida modellarni oʻqitishdan koʻra, tayyor soʻrovlarga javob berish jarayoni, yaʼni inferens (inference) bosqichi uchun hisoblash quvvatlariga ehtiyoj ancha yuqori.
Hozirda kompaniyaga vaqtinchalik bosh direktor Adam Winter va moliya direktori Matt Eng rahbarlik qilmoqda. Maʼlumotlarga koʻra, 650 million dollarlik investitsiya raundi deyarli kafolatlangan. Agar boshqa aksiyadorlar oʻz ulushlarini oshirishni istamasa, Disruptive va Infinitium jamgʻarmalari ushbu summani toʻliq qoplashga tayyorligini bildirgan.
“Zamin”ni Telegramʻda oʻqing!
