Rossiyada ortib borayotgan energiya tanqisligi fonida Belarus hukumati rossiyalik kompaniyalarga oʻz maʻlumotlarni qayta ishlash markazlarini (MQIM) ushbu mamlakat hududiga koʻchirishni taklif qildi. Minsk nafaqat energiya taʻminotini kafolatlashga, balki chegara hududlarida butun boshli maʻlumotlar markazlari klasterlarini, jumladan, "Moskva — Minsk" koridorini yaratishga tayyorligini bildirdi. Bu haqda Ixbt.com xabar beradi.
Ushbu tashabbus hozirda ikki mamlakatning sohaviy assotsiatsiyalari darajasida muhokama qilinmoqda. Belarus Yuqori texnologiyalar va raqamli infratuzilma assotsiatsiyasi rahbari Aleksey Sventitskiy hamda Rossiya MQIM sohasi ishtirokchilari assotsiatsiyasi prezidenti Igor Dorofeyev Ittifoqdosh davlat ishchi guruhlari uchun maxsus takliflar tayyorlashga kelishib oldilar. Gap nafaqat alohida maydonchalar qurish, balki hisoblash quvvatlarini energiya profitsiti mavjud hududlarga keng koʻlamli migratsiya qilish haqida bormoqda.
Muhokamalarga Rossiyada, ayniqsa Moskva shahrida yangi maʻlumotlar markazlarini qurish uchun elektr quvvati yetishmasligi sabab boʻldi. Mutaxassislarning taʻkidlashicha, Belarusda 2026-yilgacha energiya ortiqchaligi saqlanib qoladi va infratuzilmaning bir qismini koʻchirish Rossiya energiya tizimidagi yuklamani sezilarli darajada kamaytirishi mumkin.
Biroq, bunday loyihalarni amalga oshirish uchun maʻlumotlarni saqlash va qayta ishlash boʻyicha yagona tartibga soluvchi baza zarur. Hozircha Ittifoqdosh davlat doirasida yagona huquqiy maydonning yoʻqligi asosiy toʻsiq boʻlib qolmoqda. Masalan, Rossiya qonunchiligi shaxsiy maʻlumotlar bazalarini aynan mamlakat hududida saqlashni talab qiladi.
Shuningdek, MQIM klasterlari uchun nafaqat boʻsh energiya quvvatlari, balki minimal kechikish bilan ishlaydigan yuqori tezlikdagi aloqa kanallari ham oʻta muhimdir. Shu sababli, hozircha eng real loyihalar sifatida ikki davlatning chegara hududlarida joylashgan obʻektlar koʻrilmoqda.
“Zamin”ni Telegramʻda oʻqing!
