Kanaveral burnidagi LC-36 start majmuasi New Glenn raketasining portlashi oqibatida jiddiy shikastlandi. Voqea joyidan olingan ilk fotosuratlarga koʻra, xizmat koʻrsatish minorasining asosi zarar koʻrgan, chaqmoq qaytargich va transport-oʻrnatish machtasi esa butunlay vayron boʻlgan. Bu haqda Ixbt.com xabar beradi.
Bundan tashqari, yonilgʻi infratuzilmasida ham sezilarli shikastlanishlar qayd etilgan, suv minorasi esa yonib ketgan. Gaz chiqarish tizimining holati hozircha nomaʼlumligicha qolmoqda. Blue Origin kompaniyasi ayni damda yetkazilgan zarar koʻlamini baholamoqda.
Vayronagarchilik koʻlami maydonchada olib borilayotgan keyingi ishlarni sezilarli darajada sekinlashtirishi mumkin. Blue Origin ushbu majmuani rekonstruksiya qilish uchun 1 milliard dollardan ortiq mablagʻ sarflagan edi. LC-36 majmuasi New Glenn yigʻiladigan zavoddan atigi 14 km uzoqlikda joylashgani sababli, ushbu hodisa kompaniya uchun ham texnik, ham tashkiliy jihatdan ogʻir zarba boʻldi.
Portlash 28-may kuni mahalliy vaqt bilan soat 21:00 atrofida, Florida shtatidagi 36-start majmuasida kuch qurilmasini sinovdan oʻtkazish vaqtida yuz bergan. Kuchli chaqnash va portlash ovozi NASASpaceFlight.com translyatsiyasiga muhrlangan. Blue Origin sinovlar davomida "anomaliya" yuz berganini tasdiqladi, biroq xodimlardan hech kim jabrlanmagan.
Kompaniya asoschisi Jeff Bezos ayni damda hodisa sabablari oʻrganilayotganini maʼlum qildi. Ushbu muvaffaqiyatsizlik New Glenn raketasining ilk parvoz muddatlariga qanday taʼsir qilishi hozircha ochiqlanmagan.
“Zamin”ni Telegramʻda oʻqing!
