Taniqli insayder Sonny Dickson iPhone 18 Pro modellarining maketlari aks etgan yangi suratlarni eʻlon qildi. Tasvirlarda Apple kompaniyasining boʻlajak flagmanlari toʻrtta rangda namoyish etilgan: kumushrang, qora, moviy va butunlay yangi toʻq olcha (Dark Cherry) tuslari. Insayderning taʻkidlashicha, aynan ushbu chuqur toʻq olcha rangi iPhone 18 Pro seriyasining asosiy vizual oʻziga xosligi boʻladi. Bu haqda Ixbt.com xabar beradi.
Maʻlumotlarga koʻra, iPhone 18 Pro va iPhone 18 Pro Max taqdimoti 2026-yilning sentyabr oyiga rejalashtirilgan. Qurilmalar korpusi yaxlit alyuminiy qotishmasidan ishlanishi va kamera sohasida Ceramic Shield himoya qatlami bilan qoplanishi kutilmoqda. Shuningdek, yangi smartfonlar biroz qalinlashishi mumkin: iPhone 18 Pro Max qalinligi kamera boʻrtigʻi bilan birga 13,77 mm ni tashkil etishi aytilmoqda, bu esa oʻz navbatida yanada massiv foto-modul va takomillashgan optikadan dalolat beradi.
Texnik jihatdan iPhone 18 Pro seriyasi TSMC kompaniyasining 2 nanometrli texnologik jarayoniga asoslangan ilk A20 Pro chipi bilan jihozlanishi kutilmoqda. Bu smartfonlarning unumdorligi va energiya samaradorligini yangi bosqichga olib chiqadi.
Eslatib oʻtamiz, Sonny Dickson avval ham iPhone 12, iPhone 13, Apple Homepod, iPhone 15 va iPhone 17 kabi qurilmalarning dizaynini rasmiy premyeradan ancha oldin aniq bashorat qilgan ishonchli manba hisoblanadi.
“Zamin”ni Telegramʻda oʻqing!
