“Atletiko” Madrid matbuot xizmati Xulian Alvaresning “Barselona”ga ehtimoliy transferi atrofidagi xabarlarga o‘zgacha uslubda munosabat bildirdi. Madrid klubi ijtimoiy tarmoqlarda hazilomuz post joylab, kataloniyaliklarni troll qildi.
Klub Lamin Yamal, Pedri va Rafinyani “Atletiko” libosida tasvirlab, insayder Fabritsio Romano mashhur qilgan “Here we go” iborasidan foydalandi. Postda go‘yoki “Atletiko” “Barselona”ga ushbu futbolchilar uchun taklif yuborgani aytildi. Taklif esa ataylab kinoyali shaklda — “Bad Bunny” konsertiga 4 ta chipta, ABC uchun yillik to‘lov va pista sifatida tasvirlandi.
Biroq bu hazil ortidan “Atletiko” jiddiy bayonot bilan ham chiqdi. Madridliklar so‘nggi oylarda o‘z futbolchilaridan biriga nisbatan bosim, feyk xabarlar, hurmatsizlik va turli uydirmalar tarqatilayotganini ta’kidladi. Klub ayniqsa muhim o‘yinlar oldidan bo‘layotgan turli qo‘ng‘iroqlar va axborot bosimini tanqid qildi.
Bayonotda “Atletiko” bunday uslubda ish tutmasligini, futbolchilar atrofida sun’iy bosim yaratishni to‘g‘ri deb hisoblamasligini bildirdi. Shu bilan birga, klub “hakamlar rahbariyatidagi odamni pulga ishlatish” yoki “o‘yinchilarni ro‘yxatdan o‘tkazish uchun siyosiy yordamdan foydalanish” kabi keskin iboralar orqali “Barselona”ga nisbatan ochiq kinoya ham qildi.
Xulian Alvares atrofidagi transfer ovozalari so‘nggi kunlarda ancha kuchaygan. “Barselona” argentinalik hujumchini o‘z safiga qo‘shib olishni istayayotgani haqida xabarlar tarqalgandi. Ammo “Atletiko”ning bu chiqishi klub futbolchisini osonlikcha qo‘yib yuborish niyatida emasligini va axborot maydonida ham javobsiz qolmasligini ko‘rsatdi.
Qisqasi, “Atletiko” Xulian Alvares transferi haqidagi gaplar fonida “Barselona”ga hazil aralash, ammo juda keskin javob qaytardi. Madridliklar trolling bilan boshlab, jiddiy bayonot bilan yakunladi. Futbol maydonidagi raqobat endi ijtimoiy tarmoqlarda ham “qizil zona”ga kirdi.
“Zamin”ni Telegramʻda oʻqing!
