Manchester Yunayted sobiq yarim himoyachisi Eric Djemba-Djemba portugaliyalik afsona Cristiano Ronaldoning yulduzlik darajasiga chiqishida Gary Neville va Roy Keanening oʻrni beqiyos boʻlganini soʻzlab berdi. Uning soʻzlariga koʻra, yosh Cristiano «qizil iblislar» safidagi ilk yillarida jamoadoshlarining qattiq bosimi va qoʻpol muomalasiga duch kelgan, biroq bu qiyinchiliklar uni yanada kuchli qilgan. Bu haqda Goal.com xabar beradi.
Djemba-Djemba mashgʻulotlar jarayonini eslar ekan, Gary Neville va Roy Keane yosh yulduzga nisbatan juda qattiq oʻynashganini taʼkidladi. «Men mashgʻulotlarni eslayman, ular uni har safar yiqitishardi. Cristiano yigʻlardi, lekin darrov oʻrnidan turib, yugurishda davom etardi. U har doim birinchi boʻlishni, mashgʻulotda ham, oʻyinda ham gʻalaba qozonishni istardi. U bularning barchasiga loyiq edi», — deydi sobiq futbolchi.
Hozirda 41 yoshda boʻlishiga qaramay, Cristiano Ronaldo Saudiya Arabistonining Al-Nassr jamoasida yuqori saviyada oʻynashda davom etmoqda. Manchester Yunayted, Real Madrid va Yuventus kabi klublarda koʻplab sovrinlarni qoʻlga kiritgan hujumchi, faoliyati davomida beshta «Oltin toʻp» va bir necha bor Chempionlar ligasi gʻolibligiga ega chiqqan.
Djemba-Djemba Ronaldoning jismoniy holatiga qoyil qolishini yashirmadi. Uning fikricha, portugaliyalik «robot» 44-45 yoshgacha bemalol toʻp surishi mumkin. Hozirda Cristiano Ronaldo oʻz faoliyatidagi 1000-golini urishni maqsad qilgan va 2026-yilgi Jahon chempionatida oʻz terma jamoasiga sardorlik qilishga tayyorgarlik koʻrmoqda.
“Zamin”ni Telegramʻda oʻqing!
