Yaponiya uzoq yillik muhandislik anʼanalariga ega boʻlib, bu mamlakat dunyodagi eng qiziqarli va zavqli avtomobillarni ishlab chiqarishga muvaffaq boʻlgan. Miniatyuralashtirish sanʼatining yorqin namunasi boʻlgan Autozam AZ-1 modeli Mazda tomonidan ishlab chiqarilgan boʻlib, u qatʼiy kei car talablariga javob bergan. Oʻrtada joylashgan 657 kub santimetrli turbo dvigatel 63 ot kuchiga ega boʻlsa-da, avtomobilning atigi 720 kg vazni unga 100 km/soat tezlikka 8 soniyada erishish imkonini bergan. Bu haqda Autocar.co.uk xabar beradi.
1990-yillarning oxirida litriga 100 ot kuchi quvvati poyga mashinalari uchun xos edi, biroq Daihatsu Charade GTti modeli oʻzining 993 kub santimetrli motoridan aynan shuncha quvvat chiqara olgan. Ushbu yengil xatchbek nafaqat tezlanishi, balki ajoyib boshqaruvchanligi bilan ham ajralib turgan. U hatto Safari ralli musobaqalarida ham muvaffaqiyatli ishtirok etib, oʻzining chidamliligini isbotlagan.
1969-yilda taqdim etilgan Datsun 240Z sport avtomobillari olamida inqilob qildi. 151 ot kuchiga ega olti silindrli dvigatel bilan jihozlangan ushbu model Yevropadagi raqiblaridan farqli oʻlaroq, doimiy texnik xizmat talab qilmasligi bilan xaridorlarni rom etgan. Nafis kupe dizayni va mukammal dinamikasi tufayli ushbu oilaga mansub 622,649 dona avtomobil sotilgan, ayniqsa AQSH bozorida katta muvaffaqiyatga erishgan.
Yaponiya avtosanoatining eng uzoq davom etayotgan sulolalaridan biri — Honda Civic 1973-yildan beri ishlab chiqarilmoqda. Bugungi kunga qadar ushbu modelning 28 milliondan ortiq nusxasi sotilgan. Honda Civic yillar davomida oddiy xatchbekdan tortib, kuchli hot hatch va zamonaviy gidrid modellargacha boʻlgan yoʻlni bosib oʻtdi va jahon avtomobil bozorining haqiqiy barometriga aylandi.
“Zamin”ni Telegramʻda oʻqing!
