Samsung kompaniyasi yirik global mijozlarga sohadagi ilk 12 qatlamli HBM4E xotira namunalarini yetkazib berish boshlanganini eʼlon qildi. Yangi avlod xotirasi kompaniyaning HBM liniyasidagi navbatdagi bosqich boʻlib, u joriy yil boshida Samsung tomonidan ommaviy ishlab chiqarilishi boshlangan HBM4 texnologiyasining mantiqiy davomidir. Bu haqda Ixbt.com xabar beradi.
Samsung vakillarining soʻzlariga koʻra, HBM4E xotirasi sunʼiy intellekt (AI) tizimlari va katta til modellarining (LLM) ishlashini sezilarli darajada tezlashtirish uchun moʻljallangan. Ushbu texnologiya maʼlumotlarni uzatishda 14 Gbit/s barqaror tezlikni taʼminlaydi va bu koʻrsatkichni 16 Gbit/s gacha oshirish imkoniyati mavjud. Har bir stek uchun oʻtkazuvchanlik qobiliyati esa 3,6 TB/s ga yetadi.
Hozirgi 12 qatlamli versiya 48 GB hajmni taklif etmoqda, bu avvalgi avlodga nisbatan 30 foizdan koʻproq sigʻim deganidir. Kelajakda kompaniya ushbu liniyani 32 GB va 64 GB hajmli konfiguratsiyalar bilan kengaytirishni rejalashtirmoqda. Bu esa yuqori unumdorlikka ega hisoblash tizimlari uchun yangi imkoniyatlar ochadi.
Ishlab chiqaruvchining taʼkidlashicha, arxitektura va qadoqlashni optimallashtirish hisobiga energiya samaradorligi 16 foizga oshirilgan. Shuningdek, issiqlik tarqatish xususiyatlari ham avvalgi avlodga qaraganda 14 foizdan koʻproq yaxshilangan. Samsung HBM4E xotirasini ommaviy ishlab chiqarishni sinov yetkazib berish bosqichi yakunlangach, buyurtmachilarning grafiklariga muvofiq boshlashni koʻzlamoqda.
“Zamin”ni Telegramʻda oʻqing!
