Ўзбекистон фармацевтика бозорида таркибий ўзгаришлар кузатилмоқда. DATFO Analytics таҳлилий ҳисоботига кўра, 2025 йил сентябрь ойи якунларига биноан биологик фаол қўшимчалар (БАДлар) дорихоналар савдо ҳажмининг 9,5 фоизини ташкил этди.
2024 йил билан солиштирилганда, БАДларнинг пул кўринишидаги савдо ҳажми 1,7 баробар, ўрамлар бўйича эса 1,4 баробар ошган. Шу билан бирга, фармацевтиканинг бошқа кўплаб сегментлари турғунлик ҳолатида қолмоқда.
Тадқиқотга кўра, БАДларнинг асосий ўсишини АҚШдан олиб келинаётган импорт маҳсулотлар таъминламоқда. Мутахассислар таъкидлаганидек, биологик қўшимчаларнинг машҳурлигида реклама эмас, балки истеъмолчиларнинг ишончи ва оғзаки тавсиялар муҳим роль ўйнаяпти.
Талабнинг ортиши фонида дорихона тармоқлари ушбу йўналишни жадаллик билан ривожлантира бошлади. БАДларнинг дорихона савдосидаги улуши 10 фоизга яқинлашган, Тошкент шаҳрида бир мерчандизинг жавонининг ўртача қиймати атиги 30–40 АҚШ долларини ташкил этади.
Бу эса мазкур сегментни савдо майдонидан олинадиган даромад бўйича энг фойдали йўналишлардан бирига айлантиради. Сегментда мутлақ етакчи NOW Foods бренди бўлди.
DATFO Analytics маълумотларига кўра, NOW Foods БАДлар савдоси бўйича дорихона каналларини ривожлантирувчи инфратузилма иштирокчисига айланган ва бутун категория учун стандартларни белгилаб бермоқда. Соларай ва Солгар премиум сегментдаги позицияларини мустаҳкамлади.
Соларайнинг бозор улуши 1,6 фоизни ташкил этиб, савдолари қарийб икки баробар (+93 фоиз) ошди. Солгар эса 1 фоиз улуш билан 67 фоизга ўсишни қайд этди.
Swanson бренди эса тарқатиш бўйича мисли кўрилмаган ўсишга эришди — савдолари 172 фоизга ошиб, дорихоналар қамрови 118 тадан 500 та нуқтага етди. Чилдлифе болалар линияси ҳам бозорда ўз иштирокини кенгайтирди.
Дорихоналар қамрови 427 тадан 1 018 тага етган ва бозор улуши 0,56 фоизни ташкил этмоқда. ТОП брендлардан ҳеч бўлмаганда бири мавжуд бўлган дорихоналар сони 2 226 тадан 3 429 тага (+54 фоиз) ўсди.
Шундай қилиб, БАДлар энди тор доирадаги маҳсулот бўлмай, дорихона ассортиментининг мажбурий категориясига айланмоқда.
“Zamin”ни Telegram'да ўқинг!
