Олий Мажлис Қонунчилик палатаси депутатлари Ўзбекистонда 2030 йилгача яшил иқтисодиётга ўтиш стратегияси қандай амалга оширилаётгани ҳақида батафсил маълумот олиш учун вазирларга сўров юборди. Парламент йиғилишида таъкидланишича, энергетика соҳасидаги ислоҳотлар натижасида иссиқхона газлари чиқиндилари 6,3 миллион тоннага камайган.
Ушбу қисқаришнинг бир қисми (тақрибан 500 минг тонна) халқаро углерод бозорида сотилиб, мамлакатга 7,5 миллион доллар грант маблағларини олиб келган. Бундан ташқари, 6,3 миллион кВт/соат электр энергияси, 82 минг куб метр сув ва 1 050 тоннага яқин хомашё тежаб қолинган.
140 та йирик саноат ва цемент заводларида замонавий ҳаво ва газ тозалаш фильтрлари ўрнатилган. 2024 йилнинг баҳор ва куз фаслларида корхоналар ҳудудлари атрофида "яшил камарлар" ташкил этилиб, жами 11,8 миллион дарахт ва буталар экилган.
Шунингдек, давлат ўрмон фондининг фойдаланилмаётган 7 минг гектар ери мамлакат ўрмонлаш даражасини ошириш учун ўзлаштирилган. Шу билан бирга, депутатлар атроф-муҳитни муҳофаза қилиш бўйича ҳали ечилмаган муаммолар борлигига эътибор қаратди: ҳаво ифлосланиши, чиқиндиларни қайта ишлаш, экологик назорат ва энергия тежовчи технологияларни жорий этиш соҳаларида тизимли ёндашув зарур.
Ушбу масалалар фуқаролар томонидан депутатлар билан учрашувларда кўп бор кўтарилган. Эндиликда вазирлар корхоналар томонидан атроф-муҳитни ифлослантирувчи чиқиндиларни баҳолаш, зарарли моддалар чиқиндиларини камайтириш, "яшил сертификат" экологик сертификатсиясини жорий этиш, технологик жараёнларни белгилаш ва кичик бизнесни экологик стандартларга ўтишда қандай қўллаб-қувватлаётгани ҳақида тушунтириш беришлари лозим.
Меҳмон гуруҳидаги фойдаланувчилар ушбу мақолага изоҳ қолдира олмайди.
