Президент Шавкат Мирзиёев Истанбул шаҳрида ўтказилаётган 29-Евроосиё иқтисодий саммити иштирокчиларига мурожаат йўллади. Давлат раҳбари ўз мурожаатида мазкур нуфузли анжуманнинг ўтган йиллар давомида сиёсатчилар, ишбилармон доиралар, экспертлар ва халқаро ҳамжамият вакилларини бир майдонда жамлайдиган муҳим мулоқот платформасига айланганини таъкидлади.
Президентнинг қайд этишича, Евроосиё иқтисодий саммитининг айнан Истанбулда ўтказилиши чуқур рамзий маънога эга. Чунки бу тарихий шаҳар асрлар давомида Европа ва Осиёни боғлаб турган кўприк, маданиятлар, халқлар ва иқтисодий алоқалар кесишган муҳим марказ сифатида танилган. Истанбул бугун ҳам минтақалараро ҳамкорлик, савдо-иқтисодий мулоқот ва маданий яқинлашув рамзи бўлиб қолмоқда.
Шавкат Мирзиёев замонавий Туркияда Президент Режеп Таййип Эрдоған илгари сураётган “Туркия асри” стратегик ғояси изчил амалга оширилаётганини алоҳида мамнуният билан қайд этди. Давлат раҳбари Туркия халқаро майдонда долзарб муаммоларни ҳал этишда фаол иштирок этаётгани, глобал кун тартибида ўзининг нуфузли ва ишончли ўрнига эга бўлиб бораётганини таъкидлади.
Мурожаатда Ўзбекистон ва Туркия муносабатлари бугун кенг кўламли стратегик шериклик даражасига кўтарилгани ҳам алоҳида тилга олинди. Президент Мирзиёев бу жараёнда Президент Эрдоғаннинг қатъий иродаси ва изчил саъй-ҳаракатлари муҳим аҳамият касб этганини билдирди. Икки давлат ўртасидаги ҳамкорлик тенг ҳуқуқлилик, ишонч, ўзаро ҳурмат ва барқарор тараққиёт тамойилларига асослангани билан Евроосиё иқтисодий саммитининг асосий мақсадларига тўла мос келади.
Бу йилги саммит кун тартибида сув танқислиги, “яшил” ресурслар ва глобал экологик масъулият масалалари алоҳида ўрин эгалламоқда. Давлат раҳбари бугун дунё иқлим ўзгариши билан боғлиқ жиддий хавфларга дуч келаётганини таъкидлади. Чўлланиш, тупроқ емирилиши, сув захираларининг камайиши ва экологик вазиятнинг ёмонлашуви нафақат айрим давлатлар, балки бутун инсоният олдидаги умумий муаммога айланмоқда.
Айниқса, Марказий Осиёда бу жараёнлар янада кескин намоён бўлаётгани қайд этилди. Минтақада ҳарорат ошиш суръатлари жаҳон ўртача кўрсаткичларидан юқори, музликлар қисқармоқда, тупроқ деградацияси кучаймоқда. Бундай шароитда экологик барқарорликни таъминлаш Янги Ўзбекистон тараққиётининг устувор йўналишларидан бирига айланган.
Президент “Яшил макон” лойиҳаси доирасида ҳар йили 200 миллион туп дарахт экилаётганини, Орол денгизининг қуриган тубида эса кенг яшил ҳимоя майдонлари барпо этилаётганини таъкидлади. Бу ишлар нафақат табиатни муҳофаза қилиш, балки келажак авлодлар учун соғлом ва хавфсиз муҳит яратишга қаратилган муҳим қадамдир.
Шунингдек, Ўзбекистон ривожланишнинг “яшил” моделига босқичма-босқич ўтаётгани маълум қилинди. Мамлакат зарарли чиқиндилар ҳажмини 35 фоизга қисқартириш, 2035 йилга қадар эса бу кўрсаткични 50 фоизга етказишни мақсад қилган. Бу йўналишда сув ресурсларини оқилона бошқариш, сув тежовчи технологияларни жорий этиш ва табиий ресурслардан самарали фойдаланиш бўйича изчил чоралар кўрилмоқда.
Президент Мирзиёев Ўзбекистон бундан кейин ҳам “яшил” кун тартибини фаол илгари суриши, глобал экологик хавфларга қарши амалий ечимлар топишга ўз ҳиссасини қўшишини билдирди. Шу муносабат билан давлат раҳбари саммит иштирокчиларини мамлакатимизда ўтказиладиган халқаро тадбирларда, жумладан, Самарқандда бўлиб ўтадиган Глобал экологик жамғарма Ассамблеяси ва Сувни тежаш бўйича бутунжаҳон форумида иштирок этишга таклиф қилди.
Шавкат Мирзиёевнинг таъкидлашича, биргаликдаги саъй-ҳаракатлар халқаро иқлим ҳамкорлиги кун тартибига, шу жумладан БМТнинг иқлим ўзгариши бўйича бўлажак конференциясига тайёргарлик жараёнига амалий ҳисса қўшади.
Президент Ўзбекистон кенг қамровли ҳамкорлик учун доимо очиқ эканини, келгусида ҳам барқарор тараққиёт, экологик хавфсизлик ва минтақалараро шерикликни мустаҳкамлаш йўлида фаол иштирок этишга тайёрлигини маълум қилди.
Қисқаси, Шавкат Мирзиёевнинг Евроосиё иқтисодий саммити иштирокчиларига йўллаган мурожаати нафақат дипломатик мулоқот, балки келажак учун муҳим экологик ва иқтисодий чақириқ сифатида янгради. Бугунги дунёда “яшил тараққиёт” энди танлов эмас, зарурат. Ўзбекистон эса бу йўлда ўз позициясини аниқ, ишончли ва амалий қадамлар билан кўрсатмоқда.
“Zamin”ни Telegram'да ўқинг!
