Барселона ва Реал Мадрид ўртасидаги азалий рақобат навбатдаги кескин паллага кирди. Реал Мадрид президенти Флорентино Перес Негрейра иши бўйича каталонияликларни кескин танқид қилиб, клубдан 14 та чемпионлик унвони «ўғирланганини» даъво қилди. Бу ҳақда Goal.com хабар беради.
Переснинг сўзларига кўра, Барселона ҳакамлар қўмитаси собиқ вице-президентига тўловлар амалга оширгани Испания футболи тарихидаги энг катта коррупция можаросидир. У бу ҳолат мусобақа яхлитлигига путур етказаётганини таъкидлаб, UEFAга 500 саҳифалик махсус ҳисобот тақдим этишини маълум қилди.
Барселона раҳбарияти эса ушбу айбловларни рад этиб, тўловлар фақат ҳакамлар бўйича техник ҳисоботлар учун амалга оширилганини таъкидлади. Клуб матбуот хизмати Переснинг баёнотларини ҳуқуқий нуқтаи назардан таҳлил қилаётганини ва жавоб чоралари кўрилишини билдирди.
Ушбу можаро Испания футболидаги муҳитни янада таранглаштириб юборди. Томонлар ўз ҳақиқатларини исботлаш учун суд ва халқаро ташкилотлар орқали курашишга тайёрлигини намойиш этмоқда.
“Zamin”ни Telegram'да ўқинг!
