Хитойнинг Венчанг космодромидан учирилган Тианжоу-10 юк кемаси коинот тадқиқотларида янги саҳифа очди. Кема бортида дунёда илк бор очиқ коинот шароитида сунъий эмбрионларни етиштириш бўйича илмий тажриба ўтказиш учун зарур ускуналар мавжуд. Хитой Фанлар академияси (КАС) мутахассислари ушбу тадқиқот орқали инсоният Ер сайёрасидан ташқарида кўпайиш имкониятига эга ёки йўқлигини аниқлашни мақсад қилган. Бу ҳақда Ixbt.com хабар беради.
Тажрибада қўлланилаётган сунъий эмбрионлар ўзак ҳужайраларидан яратилган бўлиб, улар тўлиқ тирик организм ҳисобланмайди. Шунга қарамай, ушбу тузилмалар инсон ривожланишининг энг муҳим босқичи — уруғланишдан кейинги 14-21 кунлик даврни аниқ имитация қилади. Лойиҳа раҳбари Ю Леқиан таъкидлашича, айнан шу даврда тана аъзоларининг шаклланиши ва ривожланиш ўқлари белгиланади.
Тиангонг станциясида беш кун давом этадиган тажриба давомида тайконавтлар назорати остида автоматлаштирилган тизимлар озиқлантирувчи эритмани янгилаб боради. Бу жараён микрогравитация ва космик радиация шароитида ҳужайраларнинг қандай ривожланишини кузатиш имконини беради. Ерда бундай шароитларни тўлиқ такрорлаш имконсиз бўлгани учун бу тадқиқот фундаментал аҳамиятга эга.
Тажриба якунлангач, намуналар музлатилган ҳолда Ерга қайтарилади ва лаборатория таҳлилларидан ўтказилади. Олимлар тортишиш кучи биологик ривожланишга қандай таъсир қилишини ва инсон организми вазнсизлик шароитида қандай мослашишини ўрганишади. Бу натижалар келажакда Ой ва Марсда доимий базалар қуриш ҳамда инсониятнинг коинотда яшаб қолиши учун муҳим қадам бўлиши кутилмоқда.
“Zamin”ни Telegram'да ўқинг!
