Фарғона вилоятида Давлат хавфсизлик хизмати Чегара қўшинлари ҳамда вилоят бошқармаси ходимлари ҳамкорлигида навбатдаги муваффақиятли тезкор амалиёт ўтказилди. Риштон туманининг "Деҳқонобод" маҳалласи ҳудудида амалга оширилган ушбу тадбир давомида мамлакатимизга катта миқдордаги "ажал уруғи"ни олиб киришга бўлган уринишга чек қўйилди.
Ғилдирак ичидаги "хуфиёна омбор"
Чегарадан кириб келган Volvo русумли юк машинаси соҳа ходимларининг диққатини тортди. Текширув давомида маълум бўлишича, ушбу улкан транспорт воситасининг ғилдираклари оддий шина эмас, балки наркотик моддалар учун махсус яширин жойга айлантирилган.
Мазкур ғилдираклар ичидан хуфиёна тарзда жойлаштирилган:
3 килограмм 408 грамм «опий»;
16 килограмм 405 грамм «гашиш» моддалари топилиб, ашёвий далил сифатида расмийлаштириб олинди.
Жиноий шериклар ва "оилавий бизнес"
Тезкор тадбир давомида нафақат 1974 йилда туғилган ҳайдовчи, балки оғуни қабул қилиб олиши керак бўлган "мижоз" ҳам қўлга олинди. У Учкўприк туманида яшовчи, 2000 йилда туғилган йигит бўлиб чиқди.
Суриштирувлар жараёнида ушбу ноқонуний савдога йигитнинг 1980 йилда туғилган отаси ҳам бевосита алоқадор экани аниқланди. Эндиликда "ота-бола" ва ҳайдовчи қилмишлари учун қонун олдида жавоб беришади.
Жазо муқаррар
Ҳозирда мазкур ҳолат юзасидан Жиноят кодексининг тегишли моддалари (246-модда 2-қисми ва 25, 273-моддаси 5-қисми) билан жиноят иши қўзғатилган. Жиноят устида қўлга олинган шахсларга нисбатан «қамоққа олиш» эҳтиёт чораси қўлланилди. Ҳозирда тергов ҳаракатлари давом этмоқда.
Сизнингча, наркотик моддалар савдосига қарши курашишда жазо чораларини янада кучайтириш керакми?
“Zamin”ни Telegram'да ўқинг!
