Xitoyning Venchang kosmodromidan uchirilgan Tianzhou-10 yuk kemasi koinot tadqiqotlarida yangi sahifa ochdi. Kema bortida dunyoda ilk bor ochiq koinot sharoitida sunʼiy embrionlarni yetishtirish boʻyicha ilmiy tajriba oʻtkazish uchun zarur uskunalar mavjud. Xitoy Fanlar akademiyasi (CAS) mutaxassislari ushbu tadqiqot orqali insoniyat Yer sayyorasidan tashqarida koʻpayish imkoniyatiga ega yoki yoʻqligini aniqlashni maqsad qilgan. Bu haqda Ixbt.com xabar beradi.
Tajribada qoʻllanilayotgan sunʼiy embrionlar oʻzak hujayralaridan yaratilgan boʻlib, ular toʻliq tirik organizm hisoblanmaydi. Shunga qaramay, ushbu tuzilmalar inson rivojlanishining eng muhim bosqichi — urugʻlanishdan keyingi 14-21 kunlik davrni aniq imitatsiya qiladi. Loyiha rahbari Yu Leqian taʼkidlashicha, aynan shu davrda tana aʼzolarining shakllanishi va rivojlanish oʻqlari belgilanadi.
Tiangong stansiyasida besh kun davom etadigan tajriba davomida taykonavtlar nazorati ostida avtomatlashtirilgan tizimlar oziqlantiruvchi eritmani yangilab boradi. Bu jarayon mikrogravitatsiya va kosmik radiatsiya sharoitida hujayralarning qanday rivojlanishini kuzatish imkonini beradi. Yerda bunday sharoitlarni toʻliq takrorlash imkonsiz boʻlgani uchun bu tadqiqot fundamental ahamiyatga ega.
Tajriba yakunlangach, namunalar muzlatilgan holda Yerga qaytariladi va laboratoriya tahlillaridan oʻtkaziladi. Olimlar tortishish kuchi biologik rivojlanishga qanday taʼsir qilishini va inson organizmi vaznsizlik sharoitida qanday moslashishini oʻrganishadi. Bu natijalar kelajakda Oy va Marsda doimiy bazalar qurish hamda insoniyatning koinotda yashab qolishi uchun muhim qadam boʻlishi kutilmoqda.
“Zamin”ni Telegramʻda oʻqing!
