Шольц: Россия ва НАТО урушига олиб келадиган кескинлашувдан қочамиз

^{Олаф Шольц / Фото: Reuters}
Германия канцлери Олаф Шольц Марбургда фуқаролар билан учрашувда Украинадаги урушни «Россия ҳудудини ҳарбий жиҳатдан кенгайтириш учун узоқ вақтдан бери ўйланган режа» деб атади.

Германия Россия ва НАТО ўртасидаги урушга олиб келадиган эскалациянинг олдини олиш учун барча саъй-ҳаракатларни амалга оширади. Бу ҳақда Германия канцлери Олаф Шольц 2 февраль, пайшанба куни Марбургдаги «Фуқаролар мулоқоти» тадбири меҳмонлари билан учрашувда айтиб ўтди. «НАТО ва Россия ўртасидаги уруш даҳшатли воқеа бўлади, - дея қўшимча қилди Германия ҳукумати раҳбари. - Биз бундай кескинлашув содир бўлмаслигини таъминлаш учун жавобгармиз».

Аввалроқ, 2 февраль куни Россия президенти Владимир Путин Сталинград жангининг 80 йиллигига бағишланган хотира тадбирлари чоғида Берлиннинг Украинага Leopard 2 жанговар танкларини етказиб бериш ва бошқа давлатларга ҳам шунга ўхшаш юкларни етказиб бериш ҳақидаги қарорини изоҳлар экан, шундай деди: «Бизда жавоб берадиган нарса бор ва бу зирҳли транспорт воситаларидан фойдаланиш тугамайди. Ақл бовар қилмайдиган нарса, аммо ҳақиқат: бизга яна Германиянинг «Леопард» танклари таҳдид солишмоқда».

Кейинроқ унинг матбуот котиби Дмитрий Песков журналистларга Россия президенти нимани назарда тутганини тушунтирди: «Россия чуқур салоҳиятга эга. Коллектив Ғарб томонидан етказиб бериладиган янги қуроллар пайдо бўлиши билан Россия жавоб бериш учун ўз имкониятларидан тўлиқ фойдаланади».

1 февраль куни Германиянинг RTL ва ntv телеканаллари Forsa социологик институти томонидан уларнинг буюртмаси асосида ўтказилган сўров натижаларини эълон қилди. Унинг иштирокчиларининг 72 фоизи Украинадаги уруш унинг ҳудудидан ташқарига ҳам тарқалиши мумкинлигидан хавотир билдирди.

Аксарият респондентлар уруш туфайли Германиядаги иқтисодий аҳвол (62 фоиз) ёки ўз оиласининг молиявий аҳволи (40 фоиз) ёмонлашишидан қўрқишади. Сўров иштирокчиларининг 34 фоизи Германия ҳам Россия томонидан босиб олиниши мумкинлигидан хавотирда.

Шу билан бирга, Infratest dimap институти томонидан ўтказилган сўров натижаларига кўра, агрессияга учраган мамлакат тақдири Германия халқини ўз иқтисодий аҳволининг эҳтимолий ёмонлашувидан кўра кўпроқ ташвишга солмоқда. Хусусан, респондентларнинг 82 фоизи украиналикларнинг уруш шароитидаги ҳаётидан хавотирда, 68 фоизи уруш натижасида Германияда иқтисодий вазият ёмонлашишидан қўрқишади. Бундан ташқари, бу улуш 2022 йил апрель ойидаги сўровга нисбатан 12 фоиз пунктга камайди.

Олаф Шольцнинг Марбургдаги фуқаролар билан суҳбати чоғида бўлган FAZ газетаси мухбирининг сўзларига кўра, Украинадаги ҳарбий амалиётлар театрининг кенгайиши ва унинг Германия чегараларига яқинлашиши ҳақидаги қўрқув ушбу тадбирда муҳим роль ўйнаган. «Бир киши Украинага қурол етказиб беришни давом эттириш ўрнига «Россия билан суҳбат бошлашга уриниб кўриш» яхшироқ эмасми, деб сўраганда, биринчи марта залда қарсаклар янгради», деб ёзади журналист.

«Дипломатия – мен бунинг катта тарафдориман», - дея жавоб қайтарди Шольц. - Шунинг учун ҳам мен Путин билан телефонда гаплашадиган кам сонли одамлардан бириман». Аммо Россия Украинадан ўз қўшинларини олиб чиқмагунча, ҳужум қилинган давлатни қўллаб-қувватлаш тўғри қарор, дея қўшимча қилди Германия канцлери, шундан сўнг ҳам залда қарсаклар янгради.

Тингловчилардан бирининг НАТОнинг шарқда кенгайиши Россияни Украинага бостириб киришга ундади деган гапига изоҳ берар экан, Шольц бу фикрни рад этди. НАТО мудофаа иттифоқидир ва Россиянинг Украинага бостириб кириши муносабати билан «НАТОнинг шарқ томон кенгайиши» сўзлари қандайдир далил, деб даъво қилишнинг ҳожати йўқ», деди Германия канцлери.

Унинг сўзларига кўра, Путин билан урушдан олдин Москвада бўлиб ўтган учрашувда у Россия раҳбарини Украинанинг НАТОга қабул қилиниши «яна 30, 40 йил кун тартибида бўлмайди», деб ишонтирган. Путин учун эса Киев ва Брюссел ўртасидаги музокаралар «Россия ҳудудини зўрлик билан кенгайтириш бўйича узоқ вақтдан бери ўйланган режа учун баҳона бўлди», деди Шольц.

Айни пайтда ижтимоий тармоқ фойдаланувчилари Путиннинг Волгограддаги баёнотларини шарҳлар экан, Leopard танклари 1960-йилларнинг ўрталарида Бундесвер томонидан ишлаб чиқилган ва қабул қилинганини эслади. Шунга кўра, Иккинчи жаҳон уруши пайтида улар Россияга ҳеч қандай таҳдид сола олмаган.

Янгиликлар