Financial Times маълумотига кўра, Ҳиндистоннинг йирик саноат ва молиявий империяси — Ҳиндужа Груп конгломератининг раҳбари Гопичанд Ҳиндужа Лондон шаҳридаги шифохоналардан бирида узоқ давом этган касаллик туфайли вафот этди. Унинг ёши 84да эди.
Жорий йилнинг май ойида The Sunday Times нашри томонидан эълон қилинган Британиянинг энг бой инсонлари рўйхатида Ҳиндужа авлодлари яна биринчи ўринни эгаллади. Нашр ҳисоб-китобларига кўра, Гопичанд Ҳиндужа ва унинг оиласи мулки 35,3 миллиард фунт стерлинг (тахминан 45 миллиард доллар) деб баҳоланган.
Гопичанд Ҳиндужа оилавий бизнесга 1959 йилда қўшилган. Унинг карьераси давомида қабул қилган бир қатор стратегик қарорлар компания тақдирини тубдан ўзгартирган. Хусусан, 1984 йилда Gulf Oil — америкалик йирик нефть компаниясини сотиб олиши ва 1987 йилда молиявий инқирозга учраган Ashok Leyland — Ҳиндистоннинг тижорат транспорт воситалари ҳамда қишлоқ хўжалиги техникаси ишлаб чиқарувчисини қўлга киритиши ҳал қилувчи қадамлар бўлди.
Бу икки келишув Ҳиндужа Групнинг келажакдаги ўсишига замин яратди. Компания аввал Ҳиндистон ва Эрон бозорларига йўналтирилган кичик савдо ташкилоти сифатида фаолият бошлаган бўлса, кейинчалик энергетика, молия, автомобилсозлик ва ахборот технологиялари соҳаларини қамраб олган йирик халқаро саноат конгломератига айланди.
Гопичанд Ҳиндужа нафақат бизнес дунёсида, балки хайр-эҳсон фаолиятида ҳам фаол бўлган. У вафотидан аввал ҳам таълим, соғлиқни сақлаш ва жамоатчилик лойиҳаларига катта маблағ йўналтириб келган.
Унинг вафоти ҳақидаги хабар нафақат Ҳиндистон, балки бутун дунё бизнес доираларида чуқур қайғу билан қарши олинди. Кўпчилик уни “Ҳинд бизнесининг глобал юзи” сифатида эсга олмоқда.
“Zamin”ни Telegram'да ўқинг!
