Қуёшда икки ҳафталик нисбий тинчлик давридан сўнг кучли портлаш фаоллиги қайта кузатилди. Бу ҳақда Россия Фанлар академияси Космик тадқиқотлар институти Қуёш астрономияси лабораторияси хабар берди.
Аввалги фаолликнинг авж олиши октябрь ойи ўрталарида кузатилган бўлиб, ундан сўнг Қуёш қисқа муддатли сокинлик фазасига кирганди. Москва вақти билан соат тўртларда астрономлар Қуёшнинг шарқий четида М1.0 даражали кучли портлашни қайд этишди.
Бу қуёш фаоллигининг беш баллик ўлчов тизимида тўртинчи даража бўлиб, кучлилиги бўйича фақат Х синф портлашларига ютқазади. Мутаҳассисларнинг фикрига кўра, бу ҳодиса узоқ давом этадиган қуёш фаоллиги циклинг бошланишидан дарак беради.
Унинг авж нуқтаси 3-9 ноябр кунлари орасида кутилмоқда. Ҳозирда Қуёшнинг чап қисмида Ердан кўриниши мумкин бўлган икки йирик ва кучли фаоллик маркази кузатилмоқда.
Уларни 200-300 минг километр баландликдаги гигант магнит ҳалқалар орқали фарқлаш мумкин, бу эса Ер диаметридан 16-24 баробар катта. Бу фаол ҳудудлардан бири аллақачон 4272 каталог рақамини олган.
Қизиқ жиҳати шундаки, яқинда бўлиб ўтган портлаш ҳали рўйхатга киритилмаган, лекин каттароқ ва ҳозиргина Қуёшнинг четидан чиқиб келаётган бошқа бир ҳудудда содир бўлган. Россия Фанлар академияси мутахассислари таъкидлашича, агар бу даражадаги кучли жараёнлар фаол ҳудуд тўлиқ кўринишга чиқмасдан олдин бошланса, бу унинг улкан портлаш потенциалига эга эканлигини кўрсатади.
Кейинги икки-уч кун давомида бу жараёнлар кузатувчилар учун таъсирчан манзара бўлиб хизмат қилиши мумкин. Аммо келгуси ҳафта ўрталаридан бошлаб улар Ернинг магнитосферасига тўғридан-тўғри таъсир кўрсатиши кутилмоқда, бу эса магнит бўронларига олиб келиши хавфи бор.
Қуёшдаги портлашлар магнит бўронларини келтириб чиқариши мумкин, бу эса энергия тизимлари, радиоалоқа ва навигация асбобларининг ишлашига халал бериши, шунингдек, ҳайвонлар ва қушларнинг хатти-ҳаракатларига таъсир қилиши мумкин. Шу билан бирга, қуёш фаоллигининг ортиши қутбий ёғдуларни кузатиш зонасини кенгайтиши эҳтимоли мавжуд.
Бироқ, магнит бўронларининг инсон саломатлигига таъсири ҳақида аниқ илмий далиллар ҳозирча йўқ.
