Фронтдаги вазият: Россия армияси бир ҳафта ичида Украинанинг икки қалъасини эгаллади...

^{National Guard of Ukraine / AFP / Scanpix / LETA}
Россия қўшини бир ҳафта ичида Украина қуролли кучларининг Донецк областидаги икки муҳим истеҳкоми вазифасини бажарган Велика Новосилка ва Торецкни (иккинчи шаҳарнинг шарқий ва ғарбий чеккаларида жанглар давом этмоқда) эгаллади. Учинчи қалъа ҳам қулаш арафасида.

РФ қуролли кучлари Часив Ярнинг шимолий ва жанубий қисмларини эгаллаб олган, бу эса Украина қуролли кучларининг шаҳар марказидаги кўп қаватли бинолар вайроналарида жойлашган позициялари қулашига олиб келиши мумкин. Харкив областидаги фронтнинг Купянск участкасида россиялик ҳарбийлар Оскол дарёси ғарбий соҳилидаги плацдармини кенгайтирди ва энди уни таъминотни йўлга қўйиш ва Купянскнинг ўзига юриш бошлаш учун РФ ҳудуди билан боғлашга ҳаракат қилмоқда.

Велика Новосилка ва Курахово

Россия қўшини Велика Новосилкани эгаллади — бу Донбасс жанубидаги район марказидир. Посёлкадаги украин гарнизонининг асосий қисми қарийб қуршов ҳолатида қолганига қарамай Мокрие Яли дарёси шимолига чекинишга муваффақ бўлган. Катта эҳтимол билан, Украина қуролли кучлари 110-механизациялашган бригадасининг бир неча юз жангчилари охиригача Велика Новосилкада қолишган. 2024 йил бошида ушбу бригада бўлинмалари Авдийивкада қуршовга тушиб қолиб, оғир йўқотишларга учраганди.

Энди Россиянинг мазкур ҳудуддаги қўшини, сўнгги ҳужумларига қараганда, бор эътиборини Украина қуролли кучларининг Кураховодан ғарбдаги позицияларини бартараф этишга қаратади. Бу ерда РФ қуролли кучларининг шимолдан келган бўлинмалари украин қисмлари чекиниши учун қолган ягона йўл бўлмиш Донецк — Запорижжя трассаси яқинидаги Андреевка қишлоғига киришган. Бошқа гуруҳ эса ушбу йўлга жанубдан яқинлашиб келмоқда. Катта эҳтимол билан, Украина қуролли кучлари Курахово атрофини тарк этиб, ғарбга кетишга мажбур бўлади.

Шунда ҳам Украинанинг Курахово гуруҳи қамал хавфидан фориғ бўла олмайди: тез орада янада ғарброқда (Богатир қишлоғи ҳудудида) Велика Новосилкадан чиққан рус қўшини ҳам Донецк — Запорижжя трассасига етиб келади.

Покровск

РФ қуролли кучлари Покровскдан ғарбдаги юришини давом эттирмоқда — бу Донбасс марказидаги йирик шаҳар (урушга қадар атрофдаги ҳудудлар билан бирга 150 мингга яқин киши яшаган).

Россия қўшини Покровск ғарбидаги саноат зонасининг катта қисмини назорат остига олган. Котлино ва қўшни шахталар, шунингдек Удачное посёлкасининг бир қисми эгаллаган. Удачноедан шимолроқда Украинадаги энг йирик кокскўмир кони жойлашган, бу ерда мамлакат металлургия саноати эҳтиёжи учун зарур бўлган кўмирнинг учдан икки қисми қазиб олинади.

Россия қўшинининг кейинги нишони — шаҳарни мамлакатнинг марказий қисми билан боғловчи Покровск — Днипро йўлидир. РФ қуролли кучларининг илғор бўлинмалари трассадан беш километр масофада турибди.

Торецк ва Часив Яр

Торецк шаҳри (маъмурий чегаралари бўйича) деярли тўлиғича рус қўшини томонидан ишғол этилган. РФ қуролли кучлари шаҳар шимолидаги «Дзержинскугол» кўмир компанияси конларидан бирининг биноларини эгаллаб олган. Бу ердан Константиновка томон йўл очилади. Бу йўлда фақат яна бир кон қолган.

РФ қуролли кучлари Торецкнинг ғарбий чеккаси ҳисобланган Кримскийнинг бир қисмини эгаллаб олган. Бу ерда «Торецкая» кони ҳудудида жанглар давом этмоқда.

Шаҳардан шарқда Россия қўшини Торецкнинг бошқа бир йўлдоши — Шчербиновка посёлкасидаги назорат ҳудудини сезиларли даражада кенгайтирган.

Шу тариқа, Торецк учун кўп ойлар давом этган жанглар украинларнинг қаттиқ қаршилик кўрсатишига қарамай РФ қуролли кучлари ғалабаси билан якунланмоқда. Буёғига Россия қўшини Клебан-Бик сув омбори ва Константиновка йўналишида юриш қилишга ҳаракат қилиб кўради. Бу ҳудудга тез орада Часив Яр учун жанглардан бўшайдиган кучлар ҳам келиши мумкин.

Часив Яр шимолини эгаллаган РФ қуролли кучлари унинг жанубий қисмида — Шевченко микрорайонида ҳамда Ступочки қишлоғида ҳам юриш бошлади. Кўп ўтмай шаҳар маркази (аниқроғи, унинг кўп қаватли бинолари харобалари) уч томондан ўраб олиши мумкин, бу эса шаҳарда қолган украин кучлари мудофаасини максимал даражада оғирлаштиради.

Купянск

Россия қўшини Оскол дарёси ғарбида, Купянск шимолидаги плацдармни кенгайтирди. Украина қуролли кучлари мудофааси кучсизлашгани бунга имкон берган: бу участкада РФ қуролли кучларига Украина қуролли кучлари ҳудудий мудофаа кучларининг биргина бригадаси қаршилик кўрсатмоқда.

РФ қуролли кучлари ғарбий соҳилдаги Двуречная посёлкасининг катта қисмини, шунингдек, Новомлинск қишлоғининг бир қисмини ва унинг атрофидаги тепаликларни эгаллаган.

Купянскка яқинроқ жойлашган Западное қишлоғидаги кичикроқ плацдарм ҳам кенгайтирилган.

Катта эҳтимол билан, Россия қўмондонлиги плацдармларни РФ ҳудуди билан бирлаштиришга ҳаракат қилади: Новомлинскдан чегарагача масофа 12 километрни ташкил этади. Бу плацдармга «қуруқлик орқали» оғир техника ва артиллерияни олиб ўтиш учун ҳам керак. Плацдармдаги йирик бўлинмаларга сувга тўлиб оқувчи дарё орқали понтон кечув воситалари орқали техникалар етказиб бериш деярли имконсиз: Украина қуролли кучлари понтон кечувлар бўйлаб мунтазам равишда зарбалар йўллайди — жумладан, HIMARS ракет баравар ўт очиш реактив тизими ракеталари билан ҳам.

Манба: Kun.uz “Замин” янгиликларини “Telegram”да кузатиб боринг