Саудия Арабистони шаҳзодаси Турки ал-Файсал Ол Сауд АҚШнинг собиқ президенти Дональд Трамп томонидан илгари сурилган, Ғазо сектори аҳолисини қўшни давлатларга кўчириш ҳақидаги таклифни кескин танқид қилди.
“Фаластин халқи ўз ватанида қолиши шарт”
Шаҳзода Турки ал-Файсалнинг таъкидлашича, фаластинликлар ноқонуний муҳожирлар эмас, балки ўз ерларида яшайдиган халқдир. У бу ҳақда «The National» газетасида чоп этилган мақоласида шундай ёзди:
"Ғазо – уларнинг ватани, Исроил вайрон қилган уйлар эса уларнинг шахсий мулки. Фаластинликлар ўз уйларини аввалги босқинлардан кейин қандай тиклаган бўлса, бу сафар ҳам қайта қуриб оладилар."
80 ёшли Турки ал-Файсал 1977-2001 йилларда Саудия Арабистони разведка хизмати раҳбари сифатида фаолият юритган. Шунингдек, у подшоҳликнинг Буюк Британия ва АҚШдаги элчиси вазифасини ҳам бажарган.
Ғазо аҳолисининг кўчирилиши – янги босқиннинг бир қисми
Шаҳзода Турки ал-Файсал Ғазо аҳли – Яқин Шарқнинг тарихий аҳолиси эканини, аксинча, Исроил аҳолисининг кўпчилиги четдан келган муҳожирлардан иборат эканини таъкидлади.
"Иккинчи жаҳон урушидан кейин Европа ва бошқа минтақалардан кўчиб келган ўн минглаб яҳудий муҳожирлари Фаластин аҳолисини ўз ерларидан ҳайдаб чиқарди, уларга нисбатан зўравонлик ва этник тозалаш амалга оширилди. Афсуски, бу жараёнга Америка ва Буюк Британия қўллаб-қувватловчи позицияда турди", – деб ёзди у.
Шаҳзода агар Ғазо аҳолисига бошқа жойга кўчиш керак бўлса, уларнинг ҳақиқий ватани – Исроил ҳудудидаги тарихий ерларига қайтиш имконияти бўлиши кераклигини таъкидлади.
Халқаро ҳамжамият Ғазо аҳолисини кўчириш режасини рад этди
АҚШнинг собиқ президенти Дональд Трамп 2024 йил январ ойида Ғазони «тозалаш» мақсадида 2 миллион фаластинликни Миср ёки Иордания каби давлатларга кўчириш кераклигини айтган эди.
Бироқ бу таклиф халқаро ҳамжамият томонидан жиддий танқидга учради. Европа Иттифоқи ташқи ишлар ва хавфсизлик сиёсати бўйича олий вакили Кая Каллас Ғазо аҳолиси ҳам тинч ҳаётга ҳақли эканини таъкидлади ва ЕИ Фаластин-Исроил муаммосини «икки давлат тамойили» асосида ҳал қилишга содиқлигини тасдиқлади.
БМТнинг Инсон ҳуқуқлари бўйича олий комиссари Фолькер Тюрк эса Ғазо аҳолисини мажбуран кўчириш халқаро ҳуқуққа зид эканини эслатди. Шунингдек, Буюк Британия, Германия, Франция, Испания ва Ирландия каби давлатлар ҳам Фаластин давлатини барпо этмасдан минтақада тинчликка эришиб бўлмаслигини яна бир бор таъкидлашди.
Араб давлатлари лигаси ҳам бу таклифни қатъий рад этиб, уни Исроилнинг экспансия режасининг бир қисми деб баҳолади.
Исроилнинг Ғазо устидан назорат ўрнатиш нияти
4 февраль куни Вашингтонда бўлиб ўтган матбуот анжуманида Трамп Исроил бош вазири Бинямин Нетаняҳу билан учрашувда Ғазо устидан назорат ўрнатиш кераклигини яна бир бор иддао қилди.
Таҳлилчиларнинг фикрича, Исроил ҳукумати 2023 йил октябрь ойида бошланган урушдан фойдаланиб, Ғазо аҳолисини мажбурий равишда қўшни давлатларга кўчириш ва ҳудудни ўз назоратига олишни кўзламоқда.
Фаластинликлар янги қувғин хавфи остида
Исроил давлати 1948 ва 1967 йилларда амалга оширган мажбурий қувғинлар тарихда катта из қолдирган. Ҳозир эса Фаластин аҳолиси худди шу ҳолат такрорланишидан хавотирда.
Ҳозирча, халқаро ҳамжамият Ғазо аҳолисини оммавий равишда кўчириш режасини қўллаб-қувватлагани йўқ. Лекин Трамп ва Исроил ҳукумати бу ғояни амалга ошириш учун турли йўллардан фойдаланишни давом эттирмоқда. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
