Тошкентда ҳайдовчига болға билан ҳужум қилган аёл қамалди

Тошкент шаҳрида ҳайдовчига болға билан ҳужум қилган аёл суд ҳукми билан бир ярим йилга озодликдан маҳрум этилди, деб хабар берди суд манбалари.

Низо апрель ойида Юнусобод туманида содир бўлган бўлиб, у ижтимоий тармоқларда катта шов-шувга сабаб бўлган эди. Маълумотларга кўра, Спарк ва Матиз автомобиллари ўртасидаги кичик йўл-транспорт ҳодисасидан сўнг аёл ҳайдовчи асабийлашиб, Матиз ҳайдовчисига болға билан ҳужум қилган.

Видеолавҳада у автомашинасидан тушиб, бошқа ҳайдовчининг ойналарини синдириши ва бошига бир неча марта зарба бериши акс этган. Натижада жабрланувчи енгил мия чайқалиши ташхиси билан шифохонага ётқизилган.

Суд жараёнида ҳар икки томон бир-бирини жанжални бошлаганликда айблади. Аёл эса ҳаракатини ҳимоя сифатида изоҳлаб, ҳодисада темир болға ишлатганини тасдиқлади.

Олий суд ҳукмига кўра, у Жиноят кодексининг 277-моддаси (безорилик) бўйича айбдор деб топилиб, бир йил олти ойга озодликдан маҳрум қилинди. Шунингдек, у жабрланувчига етказилган зарар учун 5 миллион 300 минг сўм товон тўлайди.

Камола Шухратова

«ZAMIN.UZ» муҳаррири