АҚШ Россия ва Украинага сулҳ масаласида ультиматум қўйди

Вашингтонда Россия ва Украина ўртасидаги урушни якунлаш бўйича музокараларда сабр косаси тўлаётган кўринади. АҚШ Давлат департаменти расмий вакили Тэмми Брюс 29 апрель куни бўлиб ўтган матбуот анжуманида шундай баёнот билан чиқди.

«Ҳозир шундай вазиятга келдикки, ҳар икки томон ҳам зиддиятни тўхтатиш бўйича аниқ ва самимий таклифларни тақдим этиши шарт. Бундан кейин нима бўлиши ҳақида қарорни президент Трамп қабул қилади. Агар музокараларда аниқ силжиш кузатилмаса, биз бу жараёндаги воситачилик ролимиздан воз кечамиз», — деди Брюс ўз нутқида.

Аввалроқ Россия президенти Владимир Путин 9 май — Ғалаба куни муносабати билан 8 майдан бошлаб уч кунлик ўт очишни тўхтатишни таклиф қилган, лекин Москва АҚШ ва Украина таклиф қилган 30 кунлик сулҳ вариантини қатъий рад этган эди.

Давлат департаменти вакили Брюснинг таъкидлашича, Вашингтон уч кунлик эмас, балки тўлиқ ва доимий сулҳни талаб қилмоқда.

Шунингдек, АҚШ президенти Доналд Трамп ва давлат котиби Марко Рубио ҳам музокаралар тезда натижа бермаса, Америка томони бу жараёндан чиқиб кетиши ҳақида гапирган эди. Жумладан, Трамп 24 апрель куни The Atlantic нашрига берган интервьюсида, «Келаси ҳафтада нималар содир бўлишини кузатамиз, биз чегарага яқинлашдик», — деб вазиятга жиддий ёндашувини билдирган.

Давлат котиби Марко Рубио ҳам 27 апрель куни NBC News телеканалига берган интервьюсида, Россия ва Украина сулҳ масаласида етарлича ирода кўрсатмаётганидан афсус билдириб, «Келгуси ҳафта ҳал қилувчи бўлади. Биз тинчлик жараёнидаги иштирокимизни давом эттирамизми ёки эътиборимизни бошқа масалаларга қаратиш вақти келдими — буни тезда аниқлаб олишимиз шарт», — деган эди.

Таҳлилчиларнинг фикрича, Вашингтон ушбу можарода кўпроқ Кремль манфаатларини кўзда тутган тинчлик шартларини таклиф қилмоқда. АҚШ Қримни де-юре, шунингдек, рус қўшинлари 2022 йилдан бери эгаллаб турган Украинанинг тўртта вилоятини де-факто Россияга қарашли деб тан олишга тайёр. Бундан ташқари, Украина НАТО аъзоси бўлмаслиги бўйича Москва талаби ҳам қабул қилинган.

Бироқ шунга қарамай, Кремль Украина қуролли кучларини бутунлай кучсизлантириш шарти билан сулҳга келишни истамай турибди. Айниқса, сайловолди кампанияси даврида 24 соат ичида Украинадаги урушни тўхтатишга ваъда берган Доналд Трампга Путиннинг сулҳни пайсалга солаётгани асло маъқул келмаяпти.

Шу билан бирга, Трамп Украинанинг Қрим ва яна тўртта ҳудудни қайтариш борасидаги талабларини ҳам «бемаъни» деб ҳисоблаб, уларни қўллаб-қувватламаяпти.

DW радиоси Financial Times нашрига таяниб ёзишича, сўнгги икки ой давомида Кремль вакиллари ҳамда Путиннинг ўзи билан бир неча марта мулоқот қилган АҚШ мулозимлари музокаралар боши берк кўчага кириб қолганига амин бўлган.

Манбаларга кўра, Трамп маъмурияти Украина масаласида жуда катта ва саховатли таклифлар билан чиққанига қарамай, бутун Украинани босиб олиш режасидан қайтмаган Путинни сулҳга кўндира олмаётганидан тушкунликка тушган. Бу эса АҚШнинг музокаралардан чиқиб кетиши эҳтимолини янада оширмоқда. «Замин»ни Telegram’да ўқинг!