Ғазодаги машҳур шифокор атайлаб нишонга олиндими? Оиласида шубҳа йўқ

Ғазо шаҳридаги Индонезия шифохонаси директори ва юрак шифокори сифатида танилган доктор Марвон ал-Султон вафоти бутун Фаластин тиббиёт жамоаси учун катта йўқотиш бўлди. Унинг фарзандлари бу ҳаво ҳужуми тасодиф эмас, балки махсус режалаштирилган ҳужум эканлигини ишонч билан айтишмоқда.

Жорий ҳафтада Исроил ҳаво кучлари томонидан амалга оширилган ракета зарбаси натижасида доктор ал-Султон, унинг рафиқаси, қизи, опаси ва куйовининг ҳаёти узилди. Зарба айнан улар яшаган хонадонни нишонга олган. Уларнинг яшаш манзили, шимолий Ғазодан кўчирилганлар учун вақтинчалик бошпана бўлиб турган турар жой эди.

Докторнинг тирик қолган қизи Лубна: “Ҳамма хоналар жойида, фақат отам бўлган хона тўлиқ вайрон қилинган. Ракета айнан шу хонага тўғри келган,” — деди. Бу эса, ҳужум тасодифий эмаслигини кўрсатади, дейди у.

Унинг ўғли Аҳмад эса буни “атайлаб қилинган ҳужум” деб баҳолади: “Фақат 4 ва 5-қаватлар — бизнинг оиламиз жойлашган қисмлар — зарбага учради. Бунинг бошқа изоҳи йўқ. Бу отамнинг касбга садоқати учун жазоси бўлди. У ўлимигача беминнат меҳнат қилди.”

Аҳмаднинг сўзларига кўра, доктор ал-Султон кутилмаган зарба олдидан 10 дақиқа олдин у ерда бўлган. Қайтиб келганида эса кўрган манзарани сўз билан ифода этиш қийин: “Қайси тирик, қайси ўлган — ажрата олмадим. Баъзи таналар парчаланган ҳолда эди. Кўп қурбонлар — аёллар ва болалар эди.”

Доктор Марвон ал-Султон нафақат оиласи, балки бутун Ғазо жамоаси учун қадрли инсон бўлган. У фақат юрак шифокори бўлиб қолмай, балки тиббиёт соҳасида етук мутахассис ва раҳбар сифатида фаолият юритган. “Healthcare Worker Watch” ташкилотига кўра, у Ғазодаги сўнгги икки юрак мутахассисидан бири эди.

Аҳмаднинг таъкидлашича, “Отам ҳамма тарафдан ҳурмат қозонган. У Индонезия шифохонасида ҳам, Камал Адван шифохонасида ҳам муҳосарада қолган пайтда ҳам кетмаган. Жанг бошланган илк ойларда бизни фақат қисқа вақтларга кўрардик. У доим шифохонада бўларди.”

Ал-Султоннинг вафоти билан шимолий Ғазодаги барча шифохоналар раҳбарлари ё урушда ҳалок бўлди, ёки Исроил ҳарбийлари томонидан ҳибсга олинди. Жумладан, Камал Адван шифохонаси директори доктор Аҳмад ал-Кахлоут, унинг ўринбосари доктор Ҳуссам Абу Сафиё ва ал-Аўда шифохонаси раҳбари доктор Аҳмад Муҳанна ҳозирда Исроил қамоқхоналарида сақланмоқда.

Исроил Мудофаа кучлари (IDF) ушбу ҳужум бўйича шундай баёнот берди: “Чоршанба куни Ғазо шаҳри ҳудудида ҲАМАС ташкилотига мансуб асосий террорчига зарба берилди. Бунда беайб фуқаролар жабр кўрган бўлиши мумкинлиги текширилмоқда. IDF фуқароларга зарар етказишдан афсусланади ва бундай ҳолатларни камайтиришга ҳаракат қилади. ҲАМАС террорчи ташкилоти халқаро ҳуқуқни бузган ҳолда фуқароларни тирик қалқон сифатида қўллайди. Мазкур ҳодиса юзасидан тергов олиб борилмоқда.”

“Healthcare Worker Watch” маълумотларига кўра, доктор ал-Султон сўнгги 50 кун ичида Исроил зарбаси билан ҳалок бўлган 70-тиббиёт ходими бўлган. Бирлашган Миллатлар Ташкилоти эса 2023 йил октябрида бошланган урушдан буён Ғазода 1400 дан ортиқ тиббиётчи ҳалок бўлганини маълум қилди.

Женев конвенцияларига кўра, уруш пайтида тиббиёт ходимларига зарба бериш — ҳарбий жиноят ҳисобланади. Бу қонунлар шифокор ва шифохоналарни ҳимоя қилишни талаб қилади. Улар беморларга тиббий ёрдам кўрсатишни давом эттириши керак ва ҳимоя остида бўлади.

Доктор Марвон ал-Султонга қилинган ҳужум ҳақиқатан ҳам шубҳали ва кўплаб инсонларда у атайлаб нишонга олинган, деган гумонни кучайтирмоқда. Ҳужумдан зарар кўрган бинодан фақат ўша икки қават вайрон бўлгани бу гумонларни асослашда муҳим далил сифатида кўрилмоқда.

Бу нафақат бир оиланинг алами, балки бутун жамоатчилик учун ачинарли фожеа ҳисобланади. Ғазо сингари муҳосарадаги ҳудудда юқори малакали шифокорларни йўқотиш нафақат инсон сиймосини, балки жамият соғлиғини ҳам йўқотишдир. «Замин»ни Telegram’да ўқинг!