2025 йил 13 декабр куни АПЛнинг 16-турида "Ливерпул" ўз майдонида "Брайтон"ни 2:0 ҳисобида мағлуб этди. Голларнинг иккаласини ҳам Уго Экитеке урди.
Мезбонлар ўйиннинг илк сониялариданоқ юқори прессингни ишга солишди. Бурчак тўпи яқинида рақибнинг хатоси эвазига дастлабки гол киритилди.
Жо Гомеснинг узатмасини Экитеке тўпни тўрга йўналтириш билан якунлади. Шундан сўнг, "мерсисайдликлар" ўйин темпини пасайтириб, тўпни назорат қилишни давом эттиришди.
Бунга жавобан "чайкалар" асосан ўнг қанот орқали камдан-кам ҳужумлар ташкил қилишди, аммо Алиссон ва ҳимоя чизиғи буларни бемалол бартараф этди. Танаффусдан кейин меҳмонлар ҳужумни тезлаштиришга ҳаракат қилишди, лекин "қизиллар" уларни жарима майдончасининг яқинида тўхтатиб қўйишди.
Кейинчалик, Арне Слот мажбурий ўзгариш қилган ҳолда Жо Гомес ўрнига Мохамед Салахни майдонга туширди. Орадан кўп ўтмай, "Ливерпул" стандарт вазиятдан иккинчи голни киритди.
Салах узоқ устунга бурчак тўпини оширди, Экитеке эса ҳаводаги курашда ғолиб чиқиб, тўпни яқин бурчакка йўналтирди. Ўйин охирига келиб, "Брайтон" камида бир гол уришга уриниб кўрди, бироқ мезбонлар ҳисобни ушлаб туриб, ўйинни ғалаба билан якунлашди.
Меҳмон гуруҳидаги фойдаланувчилар ушбу мақолага изоҳ қолдира олмайди.
