Бразилия терма жамоаси ва “Интер” клубининг собиқ порлоқ юлдузи Адриано атрофида кутилмаган, бироқ жуда хавотирли ҳодиса юз берди. Бу сафар майдондаги рақиб эмас, замонавий технологиялардан фойдаланган фирибгарлар футболчининг оиласини нишонга олди.
Маълум бўлишича, номаълум шахс сунъий интеллект ёрдамида Адрианонинг овози ва ташқи кўринишини ишонарли тарзда сохталаштирган. Шу йўл билан у футболчининг онасини ишонтириб, 15 минг реал (тахминан 2400 евро) миқдоридаги маблағни ўтказиб беришга кўндирган. Яъни, одамни қўрқитиб ёки “қўпол босим” билан эмас — айнан ишончни ўғирлаб, оила ҳиссиётига тегиб иш кўрилган.
Бу воқеадан қаттиқ ғазабланган “Император” ижтимоий тармоқларда кескин чиқиш қилди. У видеомурожаатида фирибгарга очиқдан-очиқ огоҳлантириш йўллаб, шундай деди:
“Бу аблаҳ пулларни қайтаргани яхши. Сени топаман! Оналар, бувилар ва оила аъзоларига тегманглар”.
Адрианонинг сўзларидан кўриниб турибдики, гап пулда эмас — гап оила, айниқса она ҳақида кетганда, ҳар қандай инсонда ғурур ҳам, алам ҳам қайнайди. Шунга қарамай, кўп ўтмай собиқ ҳужумчи вазиятни сал хотиржамроқ тарзда тушунтириб, иккинчи видеони ҳам жойлади.
“Мен бу гапларни ҳиссиёт устида айтдим. Гап она ва оила ҳақида кетганда, одам хавотирга тушаркан. Бу сунъий интеллект деган матоҳ экан, ҳатто нима деб аталишини ҳам билмайман. Бугун менинг онам алданди, эртага сизнинг оилангиз бўлиши мумкин. Эҳтиёт бўлинг. Худо у йигитни кечирсин”, — деди Адриано.
Бу ерда энг оғир нуқта — фирибгарликнинг янги шакли. Илгари одамлар қўнғироқда овозни танимаслиги мумкин эди, ҳозир эса “овоз ҳам, қиёфа ҳам” ясаб берилаяпти. Оддий инсон, айниқса катта ёшдагилар учун бу нарса ҳақиқатан ҳам ўта ишонарли кўриниши мумкин. Адриано ҳам шуни айтаяпти: “Бугун менинг онам, эртага сизнинг оилангиз”.
Ҳодиса юзасидан Адрианонинг онаси полицияга ариза берган. Мутахассислар эса одамларни замонавий технологиялар орқали қилинаётган бундай алдовлардан ҳушёр бўлишга чақирмоқда.
Хулоса битта: бу “фақат машҳурларга бўладиган гап” эмас. Сунъий интеллект фирибгарларнинг қўлида ўйинчоққа айланса, ҳар бир оила хавф остида қолиши мумкин. Шунинг учун ота-она, буви-бувалар билан олдиндан келишиб олиш керак: агар “шошилинч пул” сўралса — албатта қайта қўнғироқ қилиш, яқин одам билан бошқа канал орқали тасдиқлаш ва ҳеч қачон ҳиссиётга берилиб пул ўтказмаслик. Технология тез, лекин ҳушёрлик ундан ҳам тез бўлиши шарт.
“Zamin”ни Telegram'да ўқинг!
