“ВИА Гра” гуруҳининг собиқ аъзоси, украиналик хонанда Вера Брежнева яна бир бор саҳнадаги образини янгилади. Энди у оммага “Вира” тахаллуси билан чиқиш қилаётгани ҳақида хабарлар тарқалди.
Айтилишича, хонанда концерт дастурини ҳам сезиларли равишда “тозалаган”: рус тилидаги қўшиқлар деярли қолмаган, Россия фуқароларининг хусусий тадбирларига буюртмалар эса умуман қабул қилинмаяпти — ҳатто релокантлардан ҳам эмас. Бу қарор ижодий йўналишни кескин ўзгартириш, аудиторияни қайта йиғиш ва ўз позициясини очиқ кўрсатиш сифатида баҳоланмоқда.
Нашрларда қайд этилишича, ҳозир Вира асосан Киевдаги премьера ва зиёфатларда кўриниш беради, интервьюларни фақат украин ОАВларига бераётгани айтилмоқда. Шу билан бирга, ижтимоий тармоқлардаги мухлислар базасини ҳам фаол оширяпти — бунда хайрия ва меценатлик ташаббуслари “промо”нинг бир қисмига айлангани таъкидланади: Черновцыдаги кўчманчиларга ёрдам, Мукачеводаги тиббиёт хонаси, фронтолди ҳудудлардаги болалар ва Львовдаги шифохоналарни қўллаб-қувватлаш каби йўналишлар тилга олинади.
Энг қизиғи, Вира тўлиқ украин тилидаги янги концерт дастури устида ҳам иш олиб бораётгани айтилмоқда. Ҳозирча ижтимоий тармоқларини икки тилда — украин ва инглиз тилида юритиши ҳам шу янги босқичнинг “тренди”га айланиб улгурди.
Шу орада оила атрофидаги яна бир янгилик ҳам муҳокамаларга сабаб бўлди: EADaily ва бошқа манбаларга кўра, хонанданинг 16 ёшли қизи Сара Киперман ишлатилган бренд буюмларини арзонлаштирилган нархларда сотмоқда. Масалан, Balenciaga сумкаси — 1750 доллар, Louis Vuitton — 1550 доллар, Chanel кедаси — 450 доллар, Dolce Gabbana кроссовкаси — 350 доллар деб кўрсатилган.
Хулоса шу: Вера Брежневадан Вирагача бўлган бу “ребрендинг” оддий тахаллус алмашиши эмас — бу янги аудитория, янги позиция ва янги саҳна қоидалари. Мухлислар эса бир нарсани аниқ биляпти: шоу-бизнесда “иккинчи нафас” деган нарса бор — фақат унга қаттиқ характер ва тўғри йўл керак.
“Zamin”ни Telegram'да ўқинг!
