АҚШ Давлат котиби Марко Рубио Сенатдаги тингловда Қўшма Штатлар ва Европа иттифоқчилари Украина учун хавфсизлик кафолатлари бўйича умумий тушунишга келганини билдирди. Унинг таъкидлашича, амалдаги “кафолат пакети” икки таянчга суянади: Европанинг чекланган контингенти ва АҚШнинг хавфсизлик бўйича қўшимча кафолати.
Рубио гапни очиқ қилди: бу контингент, аввало, Франция ва Британия қўшинларига таянади, АҚШ эса “қаердадир орқа фонда” туриб, умумий хавфсизликни кафолатлаш вазифасини бажаради. Яъни, сценарий шундай — Европа майдонда, Америка эса “суянч нуқта” сифатида.
Шу билан бирга, давлат котиби Европанинг урушдан кейин Украинага қўшин жойлаштириш истагини танқид қилмаслигини айтди. Лекин бир нарсани қатъий урғулади: АҚШ кўмагисиз бу мақсадни амалий ва мақбул кўринишда таъминлаш жуда қийин.
Рубионинг фикрича, муаммо фақат Украинада эмас — умумий хавфсизлик архитектурасида. У Европа давлатлари ҳозирча АҚШ ёрдамисиз “тўлиқ мустақил” ҳолатда яшай олмаслигини, бунга сабаб сифатида эса сўнгги 20–30 йилда мудофаа харажатларига етарлича маблағ ажратилмаганини кўрсатди.
Хулоса шундай: Рубио айтаётган моделда Европа масъулиятни кўпроқ ўз зиммасига олади, аммо Вашингтоннинг кафолатисиз бу схема ишончли “қалқон”га айланмайди. Эндиликда асосий савол битта — бу умумий келишув қаергача конкретлашади: қай даражадаги қўшин, қай формат, қай муддат ва қай шартлар асосида.
“Zamin”ни Telegram'да ўқинг!
