11:57 / 21.08.2018
2 649

Жаҳон тажрибаси

Жаҳон тажрибаси
Агар давлат бирор товарни, масалан буғдойни импорт қиладиган бўлса, мамлакат аҳолиси қанча буғдой истеъмол қилади ва бунинг қанчасини ўз маҳсулоти билан қондиради, буни ҳисоб-китоб қилади ва ўрганади. Чуқур таҳлиллардан кейин етмай қолган қисмни четдан келтиради. Чунки кераклигидан ортиғини олиш давлат «чўнтаги»га зарар ва энг асосийси стратегик маҳсулот борасида бировга қарам бўлмаслик.

Бу ҳолатни ўзимизга, рўзғор қилишимизга ҳам татбиқ этишимиз мумкин. Чунки ҳеч ким ўзида бор нарсани бировдан олмайди. Ўзида борнинг кўзи тўқ бўлади, қўшниникига ҳавас қилмайди.

Энди буни маънавий бойликларимиздаги мисолида кўриб чиқсак. Биз минг йиллик мафкурамизга, ҳаёт ҳақидаги тасаввур ва тушунчаларимизга эгамиз. Бошқалардан устун одоб-ахлоқимиз бор. Тараққиёт чўққисига чиққан пайтларимизда, дунёга дарс ўқиган даврларимизда ана шу тасаввур, тушунча, маърифат ва мафкурамиз сабабли шу даражаларни эгаллаганмиз. Қолаверса ўша пайтдаги «товарларимиз» билан кўнгил айнир даражада фахрланамиз, яъни чин дилдан уларнинг кучини тан оламиз.

Шундай экан, ўзимизда, уйимизда шунчалик улкан бойлигимиз, «ўз маҳсулотимиз» бўла туриб, нега энди буни четдан импорт қиламиз? Бировники, қўшниники бизникидан сифатсизлиги ва арзонлиги кўриниб турган бўлса-да, нега ўзимизнинг сифатли ва қимматбаҳо маҳсулотимизга диққат қилмаймиз? Агар биримиз унинг қадрини билмаётган бўлса, қолганларимиз нега унга билдирмаймиз?

Тўғри, юқорида айтганимдек, буғдойнинг етмайдиган қисмини импорт қилиш керак. Бўлмаса, тақчиллик ва очарчилик юзага келади. Бу ҳалокат. Биз ҳам ўзимизда йўқ маҳсулотларни келтирайлик. Билим, ишчанлик, ғайрат, тараққиёт маҳсул ва воситалари, мантиқ ва кўплаб ўзимизда тақчил «маҳсулот»ларни импорт қилинишини биз ҳам ёқлаймиз.

Фақат ўзимизда «ачиб» ётган товарларни бизга тиқиштирманг. Боримиздан унумли фойдаланишга йўл беринг. Жаҳон тажрибаси мана шу.
Мубашшир АҲМАД

Манба: Аzon.uz

Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)


Янгиликлар » Иқтисодиёт » Жаҳон тажрибаси