Лондон полицияси Англия Премьер Лигаси футболчисига нисбатан қурол билан таҳдид қилиш воқеаси юзасидан тергов ишларини бошлади. Daily Mirror маълумотича, ҳодиса бўйича машҳур футбол агенти гумонланмоқда.
Маълум қилинишича, 6 сентябрь куни исми ошкор этилмаган футболчи дўсти билан шаҳар марказида юрган пайтда номаълум шахс уларга қурол билан таҳдид қилган. Ҳодисадан кейин полиция зудлик билан суриштирувни бошлаган.
Орадан икки кун ўтиб, Англия терма жамоаси аъзоларининг бир қисми манфаатларини ҳимоя қиладиган таниқли агент ушбу иш бўйича ҳибсга олинган. Унга қурол билан таҳдид қилиш, товламачилик ва футболчининг дўстига босим ўтказиш айбловлари қўйилган.
9 сентябрь куни агент гаров эвазига озод қилинган, бироқ унга футболчи билан боғланиш, унинг клуби базасига бориш ва мамлакатни тарк этиш қатъий ман этилган. Суд унга фақат олдиндан режалаштирилган сафарларга чиқишга рухсат берган, аммо қайтгач паспортини полицияга топшириши шарт қилиб белгиланган.
Ҳозирча агентга расман айблов қўйилмаган, тергов ишлари давом этмоқда. Манбаларга кўра, жабрланувчи футболчининг бозор қиймати тахминан 60 миллион фунт стерлингни ташкил этади. Полиция ҳодисанинг бошқа тафсилотларини ва иштирокчиларнинг исмларини ошкор этмаган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
