Хитойнинг XPeng компанияси дунёдаги илк “ақлли завод”да вертикал учиш ва қўнишга қодир учувчи автомобилларни оммавий ишлаб чиқаришни бошлади, деб хабар берди “Синьхуа”.
Маълумотларга кўра, завод мамлакатнинг жанубида жойлашган бўлиб, у Land Aircraft Carrier деб номланган гибрид транспорт воситасини ишлаб чиқармоқда. У ерда олти ғилдиракли автомобил ва ундан ажраладиган электр учиш модули йиғилади.
Корхона йилига 10 мингта учиш аппарати ишлаб чиқариш қувватига эга, ҳозирча эса 5 мингта маҳсулот синов асосида тайёрланмоқда. Тўлиқ ишга тушгач, ҳар ярим соатда биттадан аппарат тайёр бўлади.
XPeng маълумотича, компания аллақачон 5 мингга яқин буюртма олган ва оммавий етказиб бериш 2026 йилда бошланади.
Учувчи автомобиль автоматик ва қўлда бошқариш режимига эга бўлиб, бир тугмада учиш ва қўнишни амалга ошира олади. Унинг узунлиги тахминан 5,5 метрни ташкил этади ва оддий ҳайдовчилик гувоҳномаси билан йўлда ҳаракатланиши мумкин.
Муттахассислар таъкидлашича, бу технология шаҳарлар орасида тез, экологик ва хавфсиз ҳаракатланишнинг янги даврини бошлаб бериши мумкин.
“Zamin”ни Telegram'да ўқинг!
