Ўзбекистонда 2026 йил 1 январдан маиший чиқиндиларни олиб чиқиб кетиш хизматлари учун тўловлар фақат онлайн шаклда амалга оширилади, деб хабар берди Чиқиндиларни бошқариш агентлиги.
Янги тартиб жисмоний ва юридик шахсларни қамраб олади ҳамда мамлакат бўйлаб санитария корхоналари орқали жорий этилади.
Агентлик маълумотича, ислоҳот аҳолига қулай тўлов имкониятларини яратиш, ҳисоб-китобларда шаффофликни таъминлаш ва коррупция ҳолатларига чек қўйишни мақсад қилади.
Эндиликда чиқинди хизматлари учун тўловлар “Тоза макон” биллинг тизими ёки электрон тўлов платформалари орқали амалга оширилади. Интернет мавжуд бўлмаган ҳудудларда эса тижорат банклари кассалари ва “Ўзбекистон почтаси” бўлимлари орқали тўлов қилиш имкони сақланиб қолади.
Шунингдек, қарздорлик мавжуд бўлган ҳолларда электр энергияси учун тўловларни қабул қилиш вақтинча тўхтатилиши мумкинлиги эслатиб ўтилди.
Мутасаддиларнинг таъкидлашича, тизим тўлиқ ишга тушгач, чиқиндиларни йиғиш ва тўловлар бўйича барча маълумотлар ягона онлайн база орқали кузатиб борилади.
