UzAuto Motors ұлттық автокөлік өндірушісі Chevrolet Cobalt автокөлiгiнiң жаңартылған моделiне бұрын-соңды болмаған сұранысты тіркеді. 3-қараша күні сағат 10:00-де басталған онлайн-келісімшарт жасау процесінде компания 100 мың автокөлікті бар болғаны 2 сағат 26 минутта сатып үлгерді.
Жаңа стратегия ретінде барлық сатылымдар тек онлайн платформа арқылы жүзеге асырылды. Бұл – процестің ашықтығын қамтамасыз ету және жасанды дүрбелеңнің алдын алу мақсатында енгізілді.
Сатылым құрылымын талдау нәтижелері көрсеткендей, автокөліктердiң дерлік бәрін жеке тұлғалар сатып алған. OneID жүйесі арқылы жеке тұлғалар 99 493 келісімшарт жасаса, заңды тұлғалардың үлесі бар болғаны 507 келісімшартты құрады.
Бұл осы модельге тұтынушылардың қызығушылығы жоғары екенін тағы да дәлелдейді. Алғашқы сағаттың өзінде 53 911 келісімшарт жасалған болса, 11:50-де олардың жалпы саны 88 мыңнан асты.
Компанияның цифрлық инфрақұрылымы жоғары жүктемеге ұшыраған: UzAvtoSavdo сайты бірінші сағатта әр секунд сайын 1180-нен астам жаңа сессияны тіркеді, алғашқы екі сағатта белсенді сессиялар саны 230 мыңнан асты. Сонымен бірге, компанияның қауіпсіздік қызметі жүйенің жұмысын бұзуға бағытталған 560 кибершабуылды сәтті тойтарды.
Осы дүрбелеңге Chevrolet Cobalt (MCM) автокөлігінің жаңғыртылған нұсқасы себеп болды. Бұл модельді шығару қазан айының ортасында басталды және 50-ден астам маңызды компонент, оның ішінде қозғалтқышты басқару блоктары мен тежеу жүйелері жаңартылды.
Сондай-ақ, автокөліктің жаңа нұсқасына круиз-бақылау, Apple CarPlay және Android Auto-ны қолдайтын мультимедиялық жүйе сияқты заманауи функциялар қосылды. Әділ теңдік пен шектен тыс дүрбелеңнің алдын алу мақсатында, UzAuto Motors 29-қазан күні келісімшарттар тек онлайн режимде жүзеге асырылатынын хабарлап, барлық дилерлік орталықтарды сату күні жапты және жүйеден ажыратты.
Сатып алушылар автокөлік үшін төлемді 7 күн ішінде толық өтеулері тиіс. Келісімшарттардың ашықтығын арттыру үшін қазан айынан бастап келісімшарттарға арнайы QR-кодтар енгізілді.
Осы кодтар арқылы сатып алушылар келісімшарттың егжей-тегжейін, оның ішінде сатып алушының аты, баға, дилер және төлем жағдайын нақты уақыт режимінде тексере алады.
