Ташкент облысында науқастардың атынан жалған аккаунттар ашып, қайырымдылық қаражаттарын иемденіп келген азамат әшкереленді. Құқық бұзушылықты Жиззах облыстық ІІБ қызметкерлері анықтап, күдікті қолға алынды.
Анықталғандай, Ташкент облысының Бөка ауданында тұратын, 1999 жылы туған Д.Р. 2025 жылдың қыркүйек айынан бастап Telegram мессенджері арқылы бірнеше жалған аккаунт ашқан. Ол түрлі әлеуметтік топтарда бұрын ауыр дертке шалдыққан, кейін жазылып кеткен адамдардың атынан таратылған фото және бейнематериалдарға өзінің банк пластикалық карта нөмірлерін қосқан.
Осылайша адамдардың сенімін пайдаланып, қайырымдылық ретінде жіберілген қаражаттарды жинап, оларды жеке қажеттіліктеріне жұмсаған. Аталған алаяқтық фактісі Жиззах қаласындағы «Заргарлик» ықшамауданында тұратын азаматтың құқық қорғау органдарына жасаған өтініші арқылы анықталған.
Қазіргі уақытта аталған жағдай бойынша Қылмыстық кодекстің тиісті баптары негізінде қылмыстық іс қозғалып, бастапқы тергеу амалдары жүргізілуде.
Осындай жағдайлар елдің басқа өңірлерінде де тіркелген. Атап айтқанда, Бұхара облысында Telegram арқылы беделді ұйым басшысының атынан жалған аккаунт ашып, кәсіпорындар мен мекемелердің басшыларына «қызметтік тапсырма» мазмұнындағы хабарламалар жолдаған адам анықталған. Ұйым басшыларының бірі алаяққа сеніп, оның картасына 8 миллион сум ақша аударған.
Сонымен қатар, шетелде қайтыс болған өзбекстандықтардың мәйіттерін елге қайтару сылтауымен ақша жинау жағдайлары жөнінде де азаматтарға ескерту жасалған. Белгілі болғандай, егер Өзбекстан азаматы шетелде қайтыс болса, оның мәйіті тиісті қорлардың қаражаты есебінен отанына жеткізіледі.
Мамандар азаматтарды мұндай жағдайларда сақ болуға, күмәнді хабарламалар мен қайырымдылық сұраныстарына сенбеуге шақырады. Сақтық — алаяқтыққа қарсы ең мықты қалқан.
