Маңдайшаларға қойылатын артық талаптар жойылуы мүмкін

Өзбекстанда сыртқы жарнама мен маңдайшаларды орналастыруға қатысты тәртіптер кәсіпкерлердің мүддесі үшін қайта қаралуда. Бұл туралы Бәсекелестік комитеті хабарлады.

Мәлім етілгендей, комитет сыртқы ақпарат құралдары мен маңдайшаларға қатысты қатынастарды реттейтін «Сыртқы жазуларды реттеу туралы» ереже жобасын қоғамдық талқылауға ұсынды.

Жаңа құжат арқылы тәжірибеде түрлі даулар мен түсінбеушіліктерге себеп болып жатқан бірқатар мәселелерге нақтылық енгізу жоспарлануда. Әсіресе, заңнамадағы бос орындар мен түсініксіз ұғымдарды жоюға ерекше назар аударылған.

Атап айтқанда, «сыртқы ақпарат құралы», «сыртқы жазу», «ақпараттық көрсеткіш», «маңдайша», «хабарландыру» және «ақпараттық тақта» сияқты терминдерге ресми және нақты анықтама берілуде.

Жобада атап өтілгендей, сыртқы ақпарат құралдары сыртқы ортаға бағытталған, бірақ жарнама немесе коммерциялық мақсатты көздемейтін ақпарат түрі болып табылады. Сол себепті мұндай құралдарға жарнамалық сипаттағы сурет немесе ақпарат орналастыруға жол берілмейді.

Сонымен қатар, кәсіпкерлер үшін ең маңызды жаңалықтардың бірі маңдайшаларға қатысты. Жаңа тәртіп бойынша сауда және қызмет көрсету нысандарында орналастырылған қызмет түрін білдіретін жазулар жарнама ретінде бағаланбайды.

Мысалы, «дәріхана», «шаштараз», «супермаркет», «ұлттық тағамдар», «аурухана», «құрылыс материалдары» немесе «ЖЖМҚ» сияқты жазулар қарапайым ақпараттық маңдайша ретінде қабылданады.

Бұл кәсіпкерлер үшін үлкен жеңілдік болуы мүмкін. Өйткені мұндай маңдайшалар үшін жарнама паспортын рәсімдеу, қосымша рұқсат алу немесе артық төлемдерді жүзеге асыру талап етілмейді.

Яғни, кәсіпкер өзі қызмет атқарып жатқан ғимараттың сыртқы бөлігіне өз атауы, мамандығы немесе өнімі туралы ақпарат орналастырса, бұл жарнама болып саналмайды.

Мамандардың пікірінше, бұл өзгерістер әсіресе шағын бизнес және жеке кәсіпкерлер үшін маңызды мәнге ие. Өйткені соңғы уақытта кейбір аймақтарда маңдайшаларды жаппай бұзу жағдайлары кәсіпкерлердің наразылығын тудырып жатқан еді.

Атап айтқанда, Ташкент қаласында маңдайшаларды жарнама ретінде бағалау және олар үшін паспорт талап етілуі көптеген дауларға себеп болған еді. 5 мамыр күні Президенттің қатысуымен өткен жиналыста да бұл мәселе көтеріліп, қолданыстағы артық тәртіптерді жою бойынша тапсырма берілген.

Бәсекелестік комитеті құжатты талқылау 25 сәуірден басталғанын және 10 мамырға дейін жалғасатынын хабарлады. Осыған байланысты кәсіпкерлер мен қоғам өкілдері жоба бойынша өз ұсыныстары мен пікірлерін білдіруге шақырылды.