Жызақ облысында селфи жасауға деген құмарлық тағы бір жағымсыз оқиғаға себеп болды. Мектеп оқушысы пойыз вагонының үстіне шығып, суретке түспек болған кезде жоғары кернеулі электр тогының соққысына ұшырады.
Белгілі болғандай, оқиға 24 сәуір күні Ғаллаарал ауданындағы Маржанбұлақ теміржол бекетінде болған. Бекетте тұрған жүк вагонының үстіне шыққан 7-сынып оқушысы сол сәтте жоғары кернеулі электр желісінің әсеріне түскен.
Ресми мәліметтерге сәйкес, зардап шеккен 2012 жылы туған кәмелетке толмаған бала шұғыл түрде аудандық медициналық мекемеге жеткізілді. Қазіргі уақытта ол жансақтау бөлімінде емделуде.
Дәрігерлердің қорытындысы бойынша, баланың денесінің 35–40 пайызын қамтыған екінші және үшінші дәрежелі ауыр күйік жарақаттары анықталған.
Оқиғаға байланысты облыстық көліктегі қауіпсіздікті қамтамасыз ету басқармасы тарапынан тексеру жұмыстары жүргізілуде.
Өкінішке орай, соңғы уақытта мұндай жағдайлар жиілеп кетті. Бұған дейін Шыршық қаласында 17 жасар жасөспірімнің де вагон үстінде тоқ соғуы салдарынан ауыр халде екені хабарланған болатын. Сондай-ақ, 27 сәуір күні тағы екі кәмелетке толмаған оқушы осындай қауіпті жағдайға тап болған.
Мамандар теміржол аумақтарында, әсіресе жоғары кернеулі желілердің жанында сақ болуға, мұндай қауіпті әрекеттерден аулақ болуға шақырады.
