Маңдайша жазуларға рұқсат талаптары жойылуы мүмкін

Сыртқы жарнама мен жазуларды орналастыру тәртібі кәсіпкерлердің мүддесін ескере отырып қайта қаралуда. Бұл туралы Бәсекелестікті дамыту және тұтынушылардың құқықтарын қорғау комитеті хабарлады.

Атап өтілгендей, «Сыртқы жазуларды реттеу туралы» ереже жобасы әзірленді, онда тәжірибеде кездесетін түсініспеушіліктер мен құқықтық олқылықтарды нақтылау көзделген.

Құжатқа сәйкес, «сыртқы ақпарат құралы», «сыртқы жазу», «маңдайша жазу» сияқты ұғымдарға нақты анықтама беріледі. Ең маңызды жаңалықтардың бірі — маңдайша жазулар жарнама ретінде бағаланбауы мүмкін.

Яғни, сауда, қоғамдық тамақтану немесе қызмет көрсету нысандарында ұйымның атауы мен қызмет түрін көрсететін жазулар жарнама болып саналмайды. Сол себепті, олар үшін жеке рұқсат алу немесе төлем жасау талабы жойылуы мүмкін.

Сонымен қатар, коммерциялық мақсаттағы жарнама материалдары бұрынғыдай жеке тәртіп негізінде бақыланады. Комитет жарнама мазмұнының заңнамаға сәйкестігін қадағалауды жалғастырады.

Бұл жоба қоғамдық талқылауға шығарылды, ұсыныстар 10 мамырға дейін қабылданады. Жауапты тұлғалар барлық кәсіпкерлер мен азаматтарды осы процеске белсенді қатысуға шақырады.