Денаудағы күрес жарысы кезінде палуан пышақталып өлтірілді

Сурхандария облысының Денау ауданында өткен ұлттық күрес жарысы қайғылы оқиғамен аяқталды. Спорт мерекесі кезінде болған жанжал салдарынан танымал палуан көз жұмды.

Мәліметтерге сәйкес, оқиға 9 мамыр күні Әбу Әли ибн Сина атындағы медициналық техникумның спорт алаңында өткен жаппай күрес шарасы кезінде болған. Алғашқы ақпараттар бойынша, жарыста жеңілген қатысушының ағасы қатты ашуланып, қарсылас тараптың өкілдеріне тап берген.

Күдікті ретінде аталып отырған Достон Джаббаров інісі жеңілгеннен кейін, қарсылас палуанның әкесі Низомиддин Чутбоевпен жанжалдасқан. Салдарынан ол өзімен бірге алып келген ас үй пышағымен ер адамның денесіне бірнеше рет соққы жасаған.

Жәбірленуші жедел түрде ауруханаға жеткізілгені айтылды. Алайда дәрігерлердің барлық күш-жігеріне қарамастан, оның өмірін сақтап қалу мүмкін болмады.

Алғашқы сот-медициналық сараптама қорытындысында марқұмның кеуде, бел және бөксе бөлігіне алған ауыр дене жарақаттары өлімге себеп болғаны жазылған.

Анықтама үшін: Низомиддин Чутбоев Денау аймағында танымал палуан ретінде белгілі болған.

Қазіргі таңда аталған жайт бойынша қылмыстық іс қозғалды. Күдікті құқық қорғау органдары тарапынан ұсталып, тергеу амалдары жүргізілуде.