Камавинга Франция құрамасында жарақат алды

Мадридтің "Реал" клубының жартылай қорғаушысы Эдуардо Камавинга Франция құрамасында жарақат алды. 23 жастағы футболшы "үш түрлі түстілердің" жаттығуларына қатыса алмады.

Журналист Фабрис Хокинстің мәліметінше, футболшының тізе сіңірі жарақаттанған. Осы себепті ол 2026 жылғы Әлем чемпионатының іріктеу кезеңіндегі Украина құрамасына қарсы ойында алаңға шыға алмайды. Франция құрама командасының бас бапкері Дидье Дешам оның орнына "Ювентус" ойыншысы Кефрен Тюрамды құрамаға шақырды.

Франция мен Украина арасындағы кездесу бейсенбі күні өтеді. Үш күннен кейін француздар Әзірбайжанға қарсы ойнайды.

Камавинганың алаңға қашан қайта оралатындығы жөнінде әзірге нақты ақпарат жоқ.