Тимо Вернер Мессимен бір лигада ойнауы мүмкін

Германияның "РБ Лейпциг" клубының вингері Тимо Вернер қысқы трансфер кезеңінде командадан кетуі мүмкін. Бұл туралы журналист Флориан Плеттенберг хабарлады.

Деректерге сәйкес, 29 жастағы футболшының қыста клубтан кету ықтималдығы артып келеді. Қаңтар айында Вернер, егер үлкен өзгерістер болмаса, Америка MLS лигасының бір клубына ауысуы мүмкін.

Ағымдағы маусымда Вернер Германия чемпионатында тек бір ойынға қатысып, бар болғаны бір минут қана ойын көрсетті. "РБ Лейпциг" клубымен шабуылшының келісімшарты келесі жазға дейін жарамды.

Transfermarkt порталы футболшының құнын 5 миллион еуро деп бағалауда.